Kasamtangan’g gihunong sa Commission on Elections (Comelec) ang pag-imprinta sa mga balota nunot sa temporary restraining order (TRO) nga giluwatan sa Supreme Court (SC) pabor sa mga politiko kansang kandidatura alang sa umaabot nga piniliay karon’g Mayo gibasura sa Comelec tungod sa nagkalainlaing kaso nga ilang giatubang.
Ang Comelec nihimo ug mga kausaban sa ilang pagpangandam sa national and local elections sa Mayo ug parliamentary elections sa Bangsamoro Autonomous Region in Muslim Mindanao (Barmm).
Sa usa ka pamahayag, ang Comelec nipasalig nga hingpit kining motuman sa mando sa SC nga nagdili kanila sa pagdeklarar nilang Subair Guinthum Mustapha ug Charles Savellano isip nuisance candidates sa ilang tinguha nga modagan sa Senado ug isip representante sa Ilocos Sur First District.
Gipaboran usab sa Comelec ang petisyon nga gisang-at ni Chito Bulatao Balintay, sakop sa mga lumad nga katawhan sa Zambales kansang certificate of candidacy (COC) pagka gobernador sa probinsiya gibasura sa Comelec.
Ang SC niisyu usab og TRO pabor kang kanhi kongresista Edgar Erice nga gi-disqualify sa Comelec isip kandidato pagka representante sa ikaduhang distrito sa Caloocan City; ug Florendo de Ramos Ritualo Jr., kinsa nihagit sa Comelec resolution nga nagkanselar sa iyang COC sa pagka konsehal sa first district sa San Juan City.
Subay sa maong kamanduan, ang Comelec nihimo og mga lakang sama sa paghunong sa pag-imprenta sa mga opisyal nga balota sa National Printing Office, mga kausaban sa database sa mga kandidato, paghimo og dul-an sa 1,700 ka ballot face templates, imbentaryo sa tanang naimprinta nga mga balota, pag-imprinta pag-usab sa tanang apektadong mga balota, ug ang pagkansela ug pag-reschedule sa pagtukod sa online voting ug counting system nga nakatakda karong Enero 15, ingon man usab ang pagkansela ug pag- reschedule sa mock elections.
Ang Comelec niingon nga adunay dul-an sa unom ka milyon ka mga balota ang naimprinta para sa local absentee voting, overseas voting, ug para sa Barmm parliamentary election ug mock election. Gisiguro sa poll body nga ang pag-imbentaryo sa tanang naimprinta nga mga balota, ang pagdala niini sa Comelec Santa Rosa warehouse, ug ang pagguba niini aron mapugngan ang bisan unsang dili awtorisado nga paggamit, magsugod sa Miyerkules, Enero 15, 2025.
“While these actions are indeed time-consuming and very costly, Comelec fully respects the decision of the Supreme Court, and we recognize these orders as part of legal processes,” matod sa Comelec.
“We likewise inform the public that while delay is also a necessary consequence, please note that there is no cause for alarm, concern or panic, as the Comelec is fully in control of the situation and will affect the necessary contingency measures to mitigate such,” dugang niini.