Ihatod sa Commission on Elections (Comelec) sa Negros Occidental ang vote counting machines (VCMs) ngadto sa buhatan sa election officers sa nagkadaiyang local government units (LGUs) karong Abril 28 ug 29 aron gamiton sa Mayo 12 nasyonal ug lokal nga piniliay.
Si Provincial Election Supervisor Ian Lee Ananoria nagkanayon nga ang mga election officers maoy tahasan sa paghatod sa mga VCM, nga gilangkuban sa 2,048 ka VCMs, ngadto sa nagkalainlaing lungsod ug siyudad sa Negros Occidental.
Matod niya aduna silay labing minos 351 ka contingency VCMs nga gamiton kung adunay kasamok.
Dugang ni Ananoria nga moabot ang mga opisyal nga balota karong Mayo 1 ug 2 ug giimbitar usab nila ang mga watchers nga susihon ang mga balota.
Ipahigayon usab sa Comelec ang testing ug sealing sa mga VCM karong Mayo 7 aron masiguro nga magamit ang mga VCM.
Gitataw ni Ananoria nga ang tanang election officers gimandoan na sa pagpahibalo sa mga kandidato kabahin sa pagpahigayon sa testing ug sealing.
Dugang pa ni Ananoria nga ang local absentee voting magsugod sa Lunes, Abril 29, ug matapos sa Mayo 1.
Siya niingon nga ang Negros Occidental adunay kinatibuk-ang 1,880 ka mga local absentee voters, nga naglakip sa Philippine National Police ug Philippine Army, ug uban pa.
Dugang niya nga ang Negros Occidental adunay kinatibuk-ang 2.14 milyunes ka mga rehistradong botante, ang ikaunom nga kinadak-ang botante sa nasud. / MAP / SunStar Philippines