Comelec, PNP: Piniliay hapsay

Comelec, PNP: Piniliay hapsay
File/From Comelec Facebook
Published on

Gihulagway sa Commission on Election region 7 nga hapsay ug malampuson ang piniliay sa tibuok Central Visayas gikan sa pagsugod sa botasyon, Lunes, Mayo 12, 2025.

Matod ni Attorney Francisco Pobe Jr ang Regional Director sa COMELEC 7 nga duna’y gamay nga problema ang nasugatan sa nahitabong misdelivered nga mga balota nga moabot sa 183 ka buok sa pito ka mga lugar sa Sugbo ug Bohol nga dali ra usab nila nga nahatagan og sulosyon.

Dunay 19 ka balota nga alang sa Balamban ang nadala kini paingon sa Lungsod sa Bantayan sa Isla sa Bantayan, 20 ka balota ang alang sa Argao nga nadala sa Aloguinsan, 102 ka balota nga alang sa Barangay Lambason sa San Remigio, naabot kini sa Barangay Tambogon sa maong lungsod.

Duna sa’y 42 ka balota alang sa Pardo, Cebu City nga na-deliver paingon sa Lungsod sa Candijay, Lalawigan sa Bohol ug dunay laing 44 usab sa nagka lainlaing presento sa Dakbayan sa Mandaue nga walay second page.

Gipasabot hinuon ni Pobe nga wala ra kini makaapekto sa pagsugod sa botasyon sa alas 7 sa buntag kay nakig-alayon dayon siya sa mga election officer aron mahatod kini sa labing dali nga panahon basi sa security protocol sa mga balota nga gipatuman.

Nakig-coordinate usab si Pobe sa PNP ug Philippine Coast Guard hilabi niadtong mga lagyo nga lugar sama sa Isla sa Bantayan nga angayan pa nga itabok og dagat aron mahatod sa lungsod sa Balamban lakip na sa ubang lugar.

Giklaro usab sa Comelec official nga wa kini makalangay sa pagtapos sa pinilay tungod kay pila lang kini ka balota nga angayan nila nga ipanghatod sa designated nga polling precinct.

“I have the feeling nga dili ni maka-delay kay gamay raman kayo, under sa statistical probability wala man gyuy hundred percent nga voting percentage sa usa ka clustered precinct, if you are going to make an example of 19 ballots chances are dili gyud ni maka apekto,” matod ni Pobe.

Nabantayan niya nga paspas ang pagboto sa mga tawo ug makahatag dayon sa resibo ang bag-ong Automated Counting Machines.

Si Police Brigadier General Redrico Maranan ang hepe sa Police Regional Office 7 nilibot sa polling centers sa tibuok Dakbayan sa Sugbo aron pagsiguro kon natuman ba sa iyang personnel ang paghatag sa siguridad.

Matod ni Maranan nga wala sila makadawat og report nga krimen nga naglambigit sa election sa tibuok Central Visayas. / AYB

Trending

No stories found.

Just in

No stories found.

Branded Content

No stories found.

Videos

No stories found.
SunStar Publishing Inc.
www.sunstar.com.ph