Ang Commission on Elections (Comelec) officer sa Lapu-Lapu City nanawagan sa mga residente nga magparehistro sa dili pa ang deadline sa Septiyembre 30.
Ang pagpangrehistro sa mga botante alang sa nagkaduol nga lokal ug nasyonal nga eleksyon sa Mayo 2025 nagsugod niadto pang Pebrero 12.
Si Atty. Ann Janette Lamban, sa Comelec Lapu-Lapu City Field Office, miingon sa SunStar Cebu, Huwebes, Septiyembre 12, nga ang mga kwalipikadong botante kinahanglan nga magparehistro sa dili pa ang deadline.
“Mao na ang deadline... Palihug ayaw paghulat hangtod sa Sept. 30, kay basin dili na namo matagad ang tanan kon daghan ang mudugok. Aduna pay igo nga oras, palihug pagparehistro sa dili pa Sept. 30,” sumala pa ni Lamban.
Base sa Hunyo 30, 2024, ang Comelec Lapu-Lapu City adunay 265,308 ka rehistradong botante sa siyudad.
Gipasabot ni Lamban nga ang mga election officer walay gi-set nga target alang sa gidaghanon sa rehistradong botante. Apan iyang gipasiugda nga aduna’y dakong pagtaas sa rehistrasyon atol sa unang duha ka buwan sa pagrehistro.
Nasayran nga adunay 14,362 ka bag-ong nagparehistro niadtong Pebrero ug Marso, samtang gikan Abril hangtod Hunyo, moabot sa 14,192 ang natala nga botante.
Nabantayan sa Comelec officer ang pagkunhod sa gidaghanon sa mga nagparehistro sa dili pa ang deadline nga adunay 1,672 ka rehistradong botante hangtod sa Sept. 11.
Matod pa nga posibleng adunay daghang mga tawo sa nahibilin nga mga adlaw sa rehistrasyon, tungod kay ang pagpangayo og voter registration usa ka rekisito sa pipila ka mga programa nga gihatag sa lokal nga kagamhanan.
“Importante para nato nga mga Pilipino nga gamiton ang atong katungod sa pagbotar… Kung dili ka rehistradong botante, dili ka makaapil sa pagdesisyon kung asa paingon ang nasod o kinsa ang mangulo sa gobyerno… Aron epektibong magamit kini nga katungod, kinahanglan una nga magparehistro,” mensahe ni Lamban.
Ang mga magparehistro mamahimong moadto sa Lapu-Lapu City Hall gikan alas 8:00 sa buntag hangtod alas 5:00 sa hapon, diin sila pagaserbisyohan sa Comelec registration site nga nahimutang sa ikaduhang andana sa building.
Sa Septiyembre 25 hangtod 27 ug 30, ang rehistrasyon pagahimuon sa Gaisano Grand Plaza Mactan sa Barangay Basak. / DPC