WALAY mga vlogger nga tugotan sa Commission on Elections (Comelec) 7 nga mosulod sa perimeter sa mga polling center atol sa adlaw sa eleksyon, Mayo 12, 2025.
Kini maoy gipahibawo ni Comelec 7 Regional Director Francisco Pobe atol sa media news forum niadtong Martes, Marso 25, 2025.
Iyang gipasabot nga kadto lang mga accredited nga sakop sa media nga dunay media pass, electoral board members ug watchers ang gitugotan nga makakuha og litrato ug video.
“Vloggers are supposed to be not-allowed personnel nga mo-cover og mga activity. Kon vlogger ra ka, you are considered as an ordinary voter. So, therefore bawal ka magbuhat ana diha,” matod ni Pobe.
Nidugang si Pobe nga ang Comelec makigtambayayong sa peacekeeping forces ug mga awtoridad gikan sa Department of Education.
“Kon mag-vlogger-vlogger man gani ka, you should be only on the outside of the perimeter,” iyang gidugang.
Gipahinumdom ni Pobe nga gidili sab ang paggamit sa cellphones atol sa pagbotar sulod sa presinto.
Matod niya nga usa ka election offense ang paggamit sa cellphones sulod sa presinto.
“That is a ground for election offense kon imo ng gamiton especially nga mag-picture ka sa balota,” matod niya.
Apan gidasig ni Pobe ang mga botante ug mga vlogger nga mokuha og video sa mga manghitabo nga anomaliya sulod sa polling center atol sa eleksyon.
“Dili nimo kalikayan, reality check nga naa gihapon nay manghatag, mangumbinser ug mangampanya ngadto. Kaning mga vloggers makit-an baya na nila,” siya nagkanayon.
Sigon niya nga ang video dako kaayo og ikatabang sa Comelec sa bisan unsang case build-up. / JPS