Nangayo og suporta sa Cebu City Hall ang usa ka unit owner sa usa ka condominium building tungod sa sobra ka dako nga bayrunon sa kuryente nga gipangolekta sa management sa maong building human sa usa ka power outage niadtong Pebrero.
Sa usa ka interbyu niadtong Dominggo, Mayo 4, niingon ang reklamante, kinsa dili gustong magpaila, nga ang Cebu Ultima Residences sa Osmeña Blvd. nakasinati og brownout niadtong Pebrero 5 nga nilungtad og tulo ka mga adlaw.
Usa ka generator ang gihatag pagkahuman, apan usa ra sa unom ka elevators sa building ang napagana niini.
Dugang pa sa nireklamo, usa ka semana human sa brownout, ang board of directors sa building nangayo og kontribusyon gikan sa mga unit owner aron makapalit og mas dako nga generator nga mobalor og P120,000.
Apan matod sa nireklamo, ang bag-ong generator wala nakahatag og lig-on nga supply sa kuryente ug kanunay usab kini apektado sa fluctuations.
Gibutang sab kini sa main entrance ug exit sa building nga nakapahimo og kabalaka sa kaluwasan sa mga residente.
Niingon ang nireklamo nga ang iyang bill sa kuryente nisaka og labaw pa sa P10,000 matag bulan nga sa kasagaran sa wala pa ang problema, mga P2,500 ra.
Gipasabot niya nga ang pagsaka sa bayrunon usa ka dakong pas-an alang kaniya nga usa nang retirado ug nagsalig sa pension.
“They keep collecting money, but the money they say is just not enough,” saysay sa reklamante sa SunStar Cebu.
Sa laing interbyu, si Susan Bernardo sa Fuente Triangle Development Corp., developer sa Ultima Residences, niingon nga ang building gidumala sa BOD nga nikuha sa Collier International Philippines Inc.
Gipasabot ni Bernardo nga ang Ultima Residences BOD gilangkuban sa unit owners.
Nidugang si Bernardo nga ang developer niputol sa electrical supply sa Ultima Residences gumikan kay wala kini nakabayad sa kuryente nga niabot na og P1.6 million human sa bagyong Odette niadtong 2021.
Matod ni Bernardo, ang BOD ni-charge og dakong bayranan sa kuryente ngadto sa unit owners unya wala sila’y apil.
Alang ni Bernardo, aron masulbad kining maong problema, mas maayong itugyan sa BOD ngadto sa developer ang pagdumala sa building. / JPS