Daghang kuwang sa fire safety documentation ug importanteng mga isyu sa electrical setup sa San Marino Residences sa Barangay Mabolo, Cebu City.
Atol sa meeting sa City Hall kagahapon, Marso 24, 2025, nga gitambungan sa pito ka homeowners ug mga representante sa Bureau of Fire Protection (BFP) Mabolo Substation, Visayan Electric Co., sa Office of the Building Official (OBO), ug ni Konsehal Jerry Guardo, chairman sa infrastructure committee, daghang kasaypanan ang nitumaw.
Si SFO3 Lemuel Vincent Alcoseba II, commander sa BFP Mabolo Substation, nitataw nga atol sa ilang inspection, ang management of San Marino Residences napakyas pagpresentar sa fire safety evaluation clearance (FSEC), usa ka mandatory certificate nga gikinahanglan sa di pa tukoron ang building.
Si Alcoseba nipasabot nga ang FSEC gikinahanglan aron ma-review ang building plans sa fire department ug masiguro nga nituman kini sa fire safety code.
Iya usab nga gitumbok ang tataw kaayo nga kalapasan nga way fire exits gikan sa ground hangtod sa third floor.
Matod niya nga aron makabutang og fire exits, ang management kinahanglan nga moaplay og bag-ong building permit tungod kay himuon man ang major renovation.
Ang OBO ni-report sab nga karaan na kaayo ang occupancy permit sa San Marino Residences kay sukad pa kini sa 2015.
Si Alcoseba nga nabutang sa puwesto niadto lang tunga-tunga sa miaging tuig nipasalig nga iyang susihon ang records nga napirmahan sa iyang gipulihan.
Tungod sa daghang nakitang kalapasan, si Guardo nagtinguha sa pagpatawag og laing tigom nga maglakip gihapon sa BFP, OBO, Veco, ug sa mga homeowner aron matuki pag-ayo ang problema.
Samtang ang Visayan Electric nibutyag nga ang electrical setup sa mga residential building wala makakuha sa standards sa individual electrical metering.
Matod sa power company nga ang “total rehabilitation” sa electrical setup gikinahanglan aron masubay sa standards ug kinahanglan nila nga makigsabot sa developer nga mao ang Landtraders World Properties Corp., labot sa technical aspects.
Usa ka homeowner nga si Atty. Ma. Alyssa Rea Nuñez nagkanayon atol sa meeting nga nisuway na sila nga makigsulti tali sa Landtraders sukad sa Septiyembre 2024 apan wala madayon.
Sa miaging report sa SunStar, ang the BFP nirekomendar sa pagpasira sa building tungod sa daghang fire safety violations apil ang kakuwang sa smoke control systems, atrium fire protection, mga depiktusong fire detection, alarm, ug communication system. Mga fire safety notices ang naisyu niadtong Oktubre 24, 2024, human gihimo ang inspection ug nakita ang mga kalapasan. / JPS