Nitahan ang kadagkuan sa construction company lakip ang nagtukod, nagdesinyo, ug ang mga inhenyero nga nagpaluyo sa katukoran sa building nga nahugno atol sa linog sa Bangkok niadtong Marso 28 nga miresulta sa 92 nga nakalas.
Si Premchai Karnasuta, presidente sa Italian-Thai Development Co, ang nag-unang kontraktor sa Thailand alang sa proyekto, ingon man mga nagdesinyo ug mga inhenyero, lakip sa 17 nga gipasakaan og kasong pagpabaya nga miresulta sa mga kamatayon, matod sa deputy police chief sa Bangkok nga si Noppasin Poonsawat miingon.
Matod ni Noppasin nga gipanghimakak sa mga mitahan ang mga pasangil.
Niabot sa 92 ka mga tawo ang namatay human mahugno ang building nga kasamtangan nga gitukod. Anaa’y pipila ka mga tawo ang wala pa mailhi.
Ang maong building, nga mao unta ang bag-ong State Audit Office, mao lamang ang nag-inusarang building sa Thailand nga nahugno atol sa linog nga nasentro sa silingang nasod sa Myanmar.
Ang pagpangita sa mga biktima sa site gihunong, apan ang pag-ila sa mga patayng lawas padayon nga gihimo pinaagi ang DNA.
Gihulagway ni Noppasin sa nakalabay nga news conference nga makita sa ebidensya ug testimonya gikan sa mga eksperto nga ang plano sa pagtukod wala masubay sa mga sumbanan ug mga code.
Ang pamantalaang Bangkok Post nagkanayon nga gitino usab sa kapulisan nga ang proyekto nagpakita og “structural flaws in the core lift shaft and substandard concrete and steel.”
Gitaho usab sa Thai media ang mga alegasyon sa kasaypanan sa proyekto hapit kada adlaw sukad sa pagkahugno sa building, kasagaran niini naglambigit sa walay klaro nga dokumentasyon alang sa proyekto.
Sa susamang mga taho ilaha usab gihatagan og gibug-aton ang papel sa Italian-Thai’s Chinese joint venture partner, ang China Railway No. 10 company, nga maoy nagpaluyo sa nagkadaiyang mga proyekto sa tibuok kalibutan.
Usa sa 17 nga gipasakaan niadtong Biyernes mao ang Chinese executive nga si Zhang Chuanling, usa ka direktor sa China Railway No. 10 nga joint venture sa Italian-Thai Development.
Nadakpan na kini niadtong nakalabay nga buwan sa kasong paglapas sa Thai business law pinaagi sa sayop nga paggamit sa mga Thai nga nominado aron magsilbing proxy sa Chinese firm aron makontrol ang joint venture.
Tulo ka Thai executives ang gidakop usab sa kaso.
Usa ka Criminal Court niisyu og warrant of arrest alang sa 17 sa kasong pagpabaya niadtong Huwebes.
Matod ni Noppasin nga 15 ang diha nga mitahan dayon sa police station ug ang duha gilauman na nga mo-surrender usab. / AP