Usa ka construction worker ug usa ka ex-convict ang gisikop sa kapulisan human nanulis og cellphone sa usa ka menor de edad sa may Barangay Mambaling, Dakbayan sa Sugbo, mga alas 2 sa kaadlawon sa Sabado, Mayo 17, 2025.
Ang mga suspek giila nga sila si Sandro Tajos, 28, ug Cyril Singson, 21, pulos taga Sitio Ginabsan, Barangay Basak San Nicolas.
Ang 17 anyos nga lalaki nga biktima, uban sa iyang inahan, personal nga ni-report sa Mambaling Police Station mahitungod sa iyang gidangatan.
Matod sa biktima nga pag-abot nila sa nahisgutang dapit, kalit lang gipugos og kuha sa suspek ang iyang cellphone nga nagkantidad og P5,500.
Sa dugang pakisusi, nahibaw-an sa kapulisan diin gatambay ang suspek hinungdan nga ila kining giadto ug malampuson nga nadakpan si Tajos.
Niangkon ang tulisan nga iyang gikuha ang cellphone apan iya kining gipasa sa iyang kauban nga kanhi piniriso nga si Singson, walay trabaho.
Daling giadto sa kapulisan ang balay ni Singson ug naaktuhan nila kini nga nagbitbit sa cellphone nga kinawat.
Sa pagkakaron, gibalhog ang duha ka suspek sa Mambaling Police Station ug mag-atubang og kasong pagpangawat. / JDG