Construction worker nanghikap og dughan sa menor, gidakop

Construction worker nanghikap og dughan sa menor, gidakop
Local News
Published on: 

NAGTINGKAGOL sa bilanggoan ang usa ka construction worker human giingong nanghikap og dughan sa 13-anyos nga batang babaye nga gaduwa og computer mga alas 9 sa gabii niadtong Sabado, Hulyo 19, 2025, sa Barangay Lahug, Dakbayan sa Sugbo. 

Nailhan ang suspek sa alyas nga Eric, 37-anyos, lumad nga taga Lungsod sa Barili apan kasamtangang nagpuyo sa nahisgutang barangay. 

Base sa imbestigasyon sa Mabolo Police Station, dihang niuli ang biktima sa ilang panimalay nisumbong kini sa iyang uyoan sa gibuhat sa suspek.

Sa ekslusibong pakighinabi sa biktima nga si alyas Ella, nitug-an siya nga naandan na niya nga magduwa og computer sa maong dapit kauban ang iyang mga higala. 

Kalit lang naabot ang suspek kinsa nigamit sab og computer duol kaniya ug matod pa nga ang pikas kamot niini nagkaduol kilid sa iyang dughan hinungdan nga nilikay siya apan nipadayon gihapon ang suspek ug gihikap na gyud ang iyang dughan. 

Samtang ang suspek nihimakak sa pasangil batok niya sanglit matod pa nasaghiran lang niya kini. Ang kabanay sa biktima desidido nga mopasaka og kaso sanglit dili lalim ang trauma nga gibati sa bata. 

Kasamtangang gitanggong sa Mabolo Police Station ang suspek. / JDG