WA na makahuman og trabaho sa balay ang usa ka construction worker human gipadakop tungod kay giingong nanghinol sa usa ka 12 anyos nga batang babaye niadtong Biyernes, Hulyo 18, 2025, sa may Sitio Lintuwang, Barangay Agsungot, dakbayan sa Sugbo.
Ang suspek nga nagtingkagol sa selda sa Talamban Police Station nailhan lang sa alyas nga Alberto, 37 anyos, lumolupyo sa Barangay Calero, lungsod sa Liloan.
Sa gihimong imbestigasyon sa kapulisan, ang suspek gidakop pinaagi sa citizen’s arrest og gi-turnover sa police station human misumbong ang biktima sa iyang amahan nga gihikap niini ang iyahang pribadong parte sa lawas.
Sa pakighinabi ni Alberto, nisaysay kini nga niadtong higayona gisakitan siya og maayo sa iyang tiyan tungod kay matud pa nakainom siya og tubig nga gikan sa tabay.
Nibutyag siya nga tungod kay nasuod na niya si alyas Lynlyn, kinsa mao ang biktima, mihangyo siya nga hiloton ang iyang likod og nisugot ra pud ang bata.
Apan pagkahuman, matud pa natingala nalang siya nga naabot ang maguwang sa bata nga nasuko tungod kay matud pa nitug-an ang biktima nga gibira siya og gihuboan ug gituslok ang iyang kinatawo sa maong suspek.
Hugot usab nga nidepensa ang suspek nga wala gyud siya nakabuhat sa salaod nga gipasangil batok niya, sanglit wala sa iyang hunahuna nga mangunay sa maong bata ilabi na nga suod ug kauban ra sila sa usa ka balay diin sila nagtrabaho. / JDG