Gidakop ang usa ka 50-anyos nga lalaki sa kapulisan niadtong mga alas 10:00 sa gabii, Hulyo 9, 2025, sa Sitio Lahing-lahing, Barangay Mabolo, Siyudad sa Sugbo kay nakit-ang nagbitbit og armas nga walay lisensya.
Giila ang suspek nga si Dionesio Vargas, minyo, usa ka helper sa construction ug residente sa maong dapit.
Gihimo ang operasyon human makadawat og taho ang Mabolo Police Station 4 gikan sa usa ka concerned citizen bahin sa usa ka armadong lalaki nga nakapalisang sa mga residente.
Niresponde ang mga sakop sa City Intelligence Unit ubos sa pagduma ni Police Colonel Enrico Figueroa, ang acting city director sa Cebu City Police Office ug malampusong nadakpan si Vargas.
Nasakmit gikan sa dinakpan ang usa ka .22 kalibre nga armas nga adunay tulo ka buhing bala.
Mag-atubang og kasong paglapas sa Republic Act 10591 o Comprehensive Firearms and Ammunition Regulation Act. / JDG