Giingong tungod sa kamingaw sa asawa, namuso nalang kining lalaki nga usa ka safety marshal ngadto sa engineer nga babaye nga iyang kauban sa trabaho sa construction site nga nahimutang duol dakong mall sa South Road Properties sa Barangay Mambaling, Dakbayan sa Sugbo mga alas 5:58 sa buntag, Hulyo 19, 2025.
Giila ang suspek sa alyas nga Willy, 33 anyos, usa usab ka timekeeper og lumad nga taga Malitbog, Southern Leyte ug kasamtangang nagpuyo sa barracks sa nahisgutang construction site.
Base sa imbestigasyon sa Mambaling Police Station, midangop sa ilang buhatan ug nangayo og tabang ang 25 anyos nga biktima nga si alyas Liza, usa ka civil engineer nga taga Barangay Poblacion, Dakbayan sa Talisay.
Dihang miresponde ang kapulisan, ilaha nga gidala ang suspek sa police station mga alas 9:30 sa kabuntagon.
Nasayran usab nga ang biktima ug suspek tapad ra og kwarto sa ilahang barracks hinungdan nga dali rang nabuhat sa maong lalaki ang pagpamuso.
Si Liza mibutyag nga gikan siya sa pansayan ug dihang nag-ilis na siya sa iyang kwarto iyang nakit-an nga dunay nag-video niya sa ibabaw nga bahin.
Matod pa nga iyaha usab kining gi-videohan ug gipakita sa iyang uyab nga kuyog niya niadtong higayuna diin ilang nakumpirmar nga gikan kini sa tapad nga lawak nga gipuy-an sa suspek.
Tungod niini, ilang gikumprontasi ang suspek ug gitan-aw ang selpon niini ug napamatud-an nga nag-video kini sa biktima samtang nag-ilis.
Midugang usab ang biktima nga dugay na siyang nakabantay niini apan wala lang niya naklaro kay matod pa pagngon sa suspek ang suga.
Samtang sa habig sa suspek, giangkon niini ang maong salaod sanglit matod pa gimingaw na siya sa iyang asawa nga tulo na ka tuig nga wala sila nagkita.
Miangkon usab kini nga na-adik siya og tan-aw og porn hinungdan nga nahimo niya ang pagpamuso.
Giklaro sa suspek nga siya ra ang magtan-aw sa video ug wala niya kini napasa o gibaligya sa lain tungod kay matod pa i-delete ra usab dayon niya kini.
Tungod sa kahadlok ug trauma nga nasinati sa biktima, desidido siya nga mopasaka og kaso ug tangtangon na usab ang suspek sa iyang trabaho.
Gibalhog na sa Mambaling Police Station ang suspek ug mag-atubang kini og kasong kalapasan sa Republic Act 9995 kun Anti- Photo and ViĀdeo Voyeurism. / JDG