TEMPORARYONG gipadaplin sa 17th Sangguniang Panglalawigan ang pag-aprobar sa consultancy appointment ni Atty. John Ismael ‘Jiembo’ Borgonia isip Consultant on Political and Social Matters sa administrasyon ni Cebu Governor Pamela Baricuatro.
Gusto sa hunta probinsyal nga imbitaron si Borgonia sa sunod nga sesyon aron mapasabot sa mga bokal ang kamahinungdanon sa huptan niining posisyon sa kapitolyo.
Ang resolusyon nga gipangamahanan ni bokal Raymond Calderon, naghatag og katungod ni Baricuatro nga mopirma unom ka buwan nga consultancy contract sa napulo ka mga tawo gikan sa Hulyo 1 hangtod sa Disyembre 31, 2025.
Naglakip kanila mao sila si Dr. Elisse Nicole B. Catalan isip Consultant on Health and Hospital Development, Atty. Serecio B. Jo isip Consultant on Transportation and Mobility, Michael Francis Acevedo Lopez isip Consultant on International Relations, Maria Victoria R. Osmeña isip Consultant on International Studies and Education, Engr. Grecilda Padilla Sanchez isip Consultant on Livelihood and Sustainable Agriculture, Atty. Edmund T. Lao isip Legal Consultant, Christopher Baricuatro isip Consultant on Legislative Matters, Romanico B. Ocampo isip Consultant on Internal Audit, ug Jose Eleazar R. Beesales isip Consultant on Heritage and Culture.
Si bokal Celestino “Tining” Martinez nipadayag sa iyang mga pangutana kabahin sa huptan nga posisyon ni Borgonia.
Samtang giaprobahan ang ubang kontrata sa nahabiling consultants, giklaro ni Bokal Neneth Reluya nga dili kini aron pag-single-out sa kanhi bokal apan alang sab kini sa pagbukas sa legislative body sa dugang pangutana. / ANV