Usa ka grupo sa mga content creator nga nailhang “Lacion Vines” ang nag-atubang karon og grabeng pagsaway gikan sa publiko human nag-viral ang ilang video niadtong Miyerkules, Hunyo 25, 2025 nga nagbiay-biay sa usa ka tawo nga aduna’y problema sa pangisip.
Kini nga hitabo nakapaalarma og lapad nga pagkondenar gikan sa mga netizen ug nakadasig sa pagpanginlabot sa mga lokal nga opisyal.
Sa usa ka video call interview niadtong Biyernes, Hunyo 27, 2025, si Deputy Chief PLt. Rhuffy Federe sa Consolacion Police Station nibutyag nga ang video nakamugna og dakong kabalaka sa mga nakakita, diin ang uban nahadlok nga basin mosangpot sa kagubot .
Giklaro ni Federe nga ang makapabalakang content gi drama-drama lang ug gituyo kini aron ipasundayag pag-usab ang usa ka insidente nga nasulbad na sa mga awtoridad.
Kini nga katin-awan gihimo human daghan sa online ang nangutana kung wala pa ba madakpan ang maong orihinal nga naay problema sa pangisip nga indibidwal.
Apan ang re-enactment nakapaalarma sa mga nakakita sa video nga nagpadayon pa ang sitwasyon ug delikado kini.
Gitataw usab ni Federe nga di kini maayo tungod kay makamugna og sayop nga pagtuo sa makakita sa video bisan humana ang hitabo.
Matod sa opisyal nga nakahatag og kahadlok ang maong video, ilabi na sa mga wala kaayo’y update sa sitwasyon lakip na ang mga tigulang nga nakakita sa content nga makatugaw ug nakapabalaka.
Ang mga nagmugna sa video boluntaryong nisurrender ngadto sa kapulisan aron ipasabot ang ilang gihimo human sa mga saway sa publiko.
Asoy ni Federe, ang nag-unang tumong sa mga creator mao ang pagpahimus sa mga views ug di kini unang nahitabo.
Matod ni Federe ang susamang insidente nga naglambigit sa “Snailman” niadtong Marso 2025, nga nihimo sa usa ka pattern sa iresponsableng paghimo og content.
Dunay posibilidad nga ang kapulisan mosang-at og kaso batok sa Lacion Vines.
Agig tubag sa grabeng pagsaway, ang Lacion Vines nagpagawas og public apology sa ilang opisyal nga page, nga nagpahayag og pagmahay sa ilang gihimo.
Gikompirmar ni Federe nga ang mga creator personal nga nitunga sa Consolacion Police Station human sa pagpangayo og pasaylo. / Zenn Dee Tejero, CNU Intern