Gipangayuan og katin-awan ang kontraktor sa nahitabong sayop sa pagbutang og lane markers sa bag-ong giayo nga rubberized track oval sa Cebu City Sports Center (CCSC), hinungdan nga wa kini makapasar o dili kuwalipikado alang sa record-breaking nga resulta, ilabi na sa athletics event atol sa 2024 Palarong Pambansa.
Ang kontraktor nga SBD Builders nangatarungan nga ang technical specifications, lakip na ang line markings, ilang gituman base sa specifications gikan sa technical committee ug gitrabaho sab sa kuwalipikado nga professional.
Sa press conference, kagahapon, Hulyo 16 ni John Pages, chairman sa Cebu City Sports Commission, iyang gikompirmar nga ang line marking sa rubberized track oval kuwang og 0.88 metros, human sa gihimo’ng sinukdanay sa Hulyo 14.
Si Acting Cebu City Vice Mayor Donaldo Hontiveros nagkanayon nga ilang gi-awhag ang buhatan sa city legal nga mosusi sa “terms of reference” sa maong proyekto nga adunay contractor compliance. / EHP/ Hulagway gikan ni Amper Campaña