Buhi pa ang paglaom sa Converge FiberXers human sila ningbangon gikan sa 27 puntos nga pagkalubong ug pakagingon ang San Miguel Beermen, 114-112, sa Game 3 sa ilang quarter-finals series sa Philippine Basketball Association (PBA) Season 49 Governors’ Cup niadtong Lunes sa gabii, Septiyembre 30, 2024, sa Ninoy Aquino Stadium.
Sa kadaugan, napahakan sa FiberXers ang bintaha sa Beermen, 2-1, ning best-of-five series.
Si Fil-Am Alex Stockton maoy nahimong bayani alang sa FiberXers human niya namugna ang nakapadaog nga buzzer-beater nga puntos.
Ang Beermen daw paingon na nga moharos pagdaog sa series dihang naposte nila ang ilang labing dakong labaw nga 27 puntos, 83-56, sa 3rd quarter.
Apan human niini, paspas nga ninggukod ang FiberXers hangtod nga nailog nila ang labaw, 108-107, sa hinapos nga bahin sa 4th quarter.
Ning higayuna, naghinugtanay sa bakus ang duha ka mga kampo hangtod na sa katapusang gutlo.
Ang FiberXers gipangulohan ni Justin Arana pinaagi sa iyang 23 puntos, niamot og 20 puntos si Stockton samtang ningdugang og 17 puntos matag usa sila si import Jalen Jones ug Bryan Santos.
Ang Beermen gipangulohan sa ilang import nga si EJ Anosike pinaagi sa 39 puntos niini, nihatag og 18 puntos si CJ Perez, niamot og 14 puntos si Marcio Lassiter samtang nitunol og 12 puntos sila si June Mar Fajardo ug Terence Romeo.
Sa laing duwa, gipangpukan sa Brgy. Ginebra Gin Kings ang Meralco Bolts, 113-106, sa Game aron haruson pagdaog ang ilang kaugalingong quarter-finals series, 3-0.
Ang Gin Kings maoy labing unang puwersa nga nakasulod sa semi-finals, nga kombatihon pinaagi sa best-of-seven series.
Puntos matag usa:
1st game:
Ginebra (113) - Brownlee 23, Holt 19, J.Aguilar 19, Abarrientos 17, Ahanmisi 17, Thompson 16, Devance 2.
Meralco (106) - Durham 38, Quinto 19, Newsome 14, Banchero 10, Hodge 10, Caram 7, Bates 4, Rios 2, Mendoza 2.
2nd game:
Converge (114) - Arana 23, Stockton 20, Jones 17, Santos 17, Caralipio 11, Winston 10, Cabagnot 8, Nieto 7, Delos Santos 2, Ambohot 1.
San Miguel (112)- Anosike 39, Perez 18, Lassiter 14, Fajardo 12, Romeo 12, Ross 6, Rosales 6, Trollano 3, Cruz 2. / ESL