Coordinator sa illegal numbers game nga Swertres ug laing 18 ka mga sugarol ang nadakpan gumikan sa illegal nga sugal sa nagkadaiyang dapit sa Probinsiya sa Sugbo.
Wala kaipsot si Rafael Berdin Pacaldo, 64, coordinator, nga taga Barangay Babag, Dakbayan sa Lapu-Lapu ang napusasan, ingon man si Demetrio Degamo Inting, 53, giingong usher.
Si Pacaldo ug Inting, nasikop sa 4:50 sa hapon, Agusto 13, 2024 sa Purok 6, Brgy. San Miguel, Lungsod sa Cordova.
Si Police Major Joffre D. Grande, hepe sa Cordova Police Station maoy nangulo sa Anti-illegal gambling operation inabagan sa King Dragon Gaming and Amusement Corporation.
Ang pagkasikop nilang Pacaldo ug Inting, resulta kini sa subsob nga operasyon sa kapulisan.
Si Pacaldo nakuhaan sa iyang bet stubs nga adunay nagkadaiyang digit number combinations, P1,000.00 gituohang halin sa sugal, ug P20 nga gipusta.
Samtàng si Inting nakuhaan og bet stubs nga adunay nagkadaiyang digit number combination, P180 nga halin sa illegal nga sugal, ug ubang gamit sa pagtaya.
Wala lung-i ni Major Grande ang paggukod sa illegal numbers game ubos sa ilang hurisdiksiyon ingon man ubang ilegal nga sugal.
Samtang milampos sab ang ubang unit sa kapulisan sa pagsikop sa nalambigit sa illegal numbers game sa probinsiya.
Usa ka si Joel Allosa, 26, taga Brgy. Baliwagan, Lungsod sa Balamban, nadakpan alas 11:00 sa buntag, Agusto 9, 2024, Barangay Owak, Lungsod sa Asturias.
Si Irene Enriquez, 38, nasikop sa 7:00 gabii, Agusto 9, 2024 sa Brgy. Dawis Sur, Lungsod sa Carmen diin si Rolphy Pahugot, 36, nadakpan niadtong Agusto, 11, 2024 sa Brgy. Poblacion Barili.
Laing nasikop si Jestone Monterola, 19, Brgy. Mantalongon, Barili; Perly Jane Bautista, 27, aka Liklik, taga Brgy. Calajo-an, Minglanilla; Ma. Gryrchie Bacalso, 25, taga Brgy. Tunghaan, Minglanilla; Ace Sasam, taga Brgy. San Isidro, Lungsod San Fernando; Saturnino Tulib, 58, taga Brgy. Banhigan, Badian; Tatchie Arnado, 21, taga Brgy. San Miguel San Remegio; si Merlyn Labuca, 54, taga Brgy. South Poblacion Naga; Marvin Dalaniel, 28, taga Brgy. Colon, dakbayan Naga; Nest Vincent Larita, 27, taga Colon; Arnel Papellero, 26, taga Brgy. West Poblacion, Naga; Daniel Requinto, 20, taga Brgy. Colon Dakbayan sa Naga; Shiela Mae Lanes, 38, taga Brgy. Poblacion, Naga; ug Elmer Odlot, 36, taga Brgy. West Poblacion, Naga. / GPL