Coordinator sa illegal numbers swertres games nadakpan uban sa 22 ka tawo human sa gipahigayong operasyon sa kapulisan batok sa ilegal nga sugal sa nagkadaiyang lugar sa Probinsiya sa Sugbo sulod sa duha ka semana sa bulan sa Pebrero 2025.
Napusasan si Emely Cañete, 46, minyo, “Coordinator,” taga Barangay Tindog, Lungsod sa Medellin, Sugbo niadtong alas 6:30 sa gabii Pebrero 15, 2025.
Lakip sa napusasan ang iyang Usher nga si Sheila Broñola, 39, nagpuyo sa nahisgutang lugar.
Ang duha naaktuhan sa kapulisan sa intensified anti-illegal gambling operation ug nakuha sa ilang possession ang daghang mga gambling paraphernalia ug pusta sa sugal.
Si Police Col. Percival Zorrila, Director sa kapulisan sa Probinsiya sa Sugbo nimando sa iyang mga sakop paghimo og operasyon batok sa illegal numbers swertres games nga walay permiso gikan sa buhatan sa Philippine Charity Sweepstakes Office (PSCO).
Napusasan usab ang usa ka usher human niisyu sa combination number nga 214 ngadto sa nagpakaaron-ingnon nga mopusta apan usa diay ka polis niadtong ala 1:00 sa hapon, Pebrero 12, 2025, sa Barangay North Poblacion, Dakbayan sa Naga.
Si Francis Plando, 23, ulitawo, nagpuyo sa nahisgutang lugar, nadakpan ug nakuha sa iyang possession ang combination number, pusta ug ubang gambling paraphernalia.
Pabuwenas unta sa nipusta sa 214 para sa Valentine’s day apan gidakop siya human sa transaction hinungdan sa prisohan nagsaulog.
Ang mga dinakpan gipasakaag kasong kalapasan sa RA 9287, Illegal numbers game (Swertres).
Si Col. Zorrila nanawagan sa padayong namusta og Swertres nga moundang na tungod kay ang kapulisan walay hunong sa ilang operasyon. / GPL