Nisang-at og protesta si kanhi Mandaue City Mayor Jonas Cortes ngadto sa Commission on Elections (Comelec) aron kwestyunon ang resulta sa Mayo 12, nga eleksyon sa pagka mayor nga si Thadeo Jovito “Jonkie” Ouano ang gideklarar nga mananaog.
Ang protesta gidawat sa Comelec Judicial Records Division niadtong Mayo 23, 2025, nga nagkuwestiyon sa proklamasyon ni Ouano isip bag-ong mayor ug nitumbok sa mga kahiwian sa bag-o lang natapos nga eleksyon.
Si Cortes, nidagan ubos sa 1 Cebu Political Party, nikwestyon sa kaligdong sa automated voting system ug sa pagpahigayon sa eleksiyon.
Ang kampo ni Cortes nipasangil og mga kahiwian nga naglakip sa gihulagway nila nga pagpanikas nga natago sa software sa pag-ihap sa mga boto ug ang pagpanikas nga may kalabutan sa paglapas sa mga pamaagi nga nakita sa adlaw sa eleksyon.
Usa sa mga dagkong isyu nga gilakip sa petisyon naglambigit sa clustered precincts nga ang giihap nga boto mas daghan pa sa narehistro nga mga botante.
Matod ni outgoing City Administrator Jamaal James Calipayan sa interview niadtong Biyernes, Mayo 23, nga ang maong kasaypanan moresulta sa pagkuwestiyon sa kaligdong sa electoral process ug sa tinuod nga mandato sa katawhan.
Sentro sa gikwestyon sa kampo ni Cortes ang detailed report sa 14 clustered precincts nga ang gidaghanon sa naihap nga balota nisobra sa gidaghanon sa narehistro nga mga botante ug sa actual nga gidaghanon sa namotar.
Lakip sa mga presinto nga kadudahan mao ang Barangay Subangdaku (Cluster Precinct ID: 22300216): 885 registered voters, 766 actual voters, apan 960 ang naihap nga balota. Barangay Pagsabungan (Cluster Precinct ID: 223): 789 registered voters, 688 actual voters, apan 754 ang valid votes nga na-record. Barangay Tabok (Cluster 1): 827 registered voters, 739 actual voters, ug 924 ang naihap nga balota. Barangay Tabok (Cluster 2): 962 registered voters, 871 actual voters, apan niabot og 1,159 ang mga balota nga naihap.
Apan ang reklamo nabasura tungod sa giingong “mislabeling issue,” rason nga gihulagway ni Calipayan nga dili igo tungod sa kabug-at sa pasangil.
“Tungod sa kadugay na nilang paggamit sa automated voting system, for them to make such a rookie mistake it’s just not credible,” matod niya.
Iyang gidugang nga ang ilang kampo mopasaka sa ilang kaso ngadto sa Supreme Court kon gikinahanglan.
Sa iyang bahin, si Mayor-elect Jonkie Ouano nagkanayon nga iyang gitahod ang katungod ni Cortes nga mosang-at og protesta apan nikwestyon sa tayming.
“That is his prerogative. Pero, sukwahi ni sa iyang gi ingon nga unity ug magtinabangay para sa Mandaue. I will leave it to our legal team to respond. Kay ang akong focus karon is to prepare for the orderly transition and make sure that my priorities like a new modern Mandaue city college building and a modern hospital, among others, are going to be implemented,” matod ni Ouano .
Sa nakalabay nga eleksyon, si Ouano nakakuha og 101,549 votes, ug nipilde ni Cortes, nga dunay 94,488 votes.
Laing nanagan pagka mayor mao sila si Joey Cortes, nga nakakuha og 2,667 votes, ug Gepind Requierme, nga dunay 999 votes. / CAV