BAG-O na ang hepe sa Cebu Provincial Police Office (CPPO) human pulihi si Police Colonel Jovito Atanacio nga nidumala sulod sa kapin unom ka buwan.
Ang nihulip kaniya isip Acting CPPO Director mao ang hepe sa Criminal Investigation and Detection Group-Regional Field Unit 7 nga si Police Colonel Christopher Moreno Bermudez.
Nangulo sa turnover of command ang hepe sa Police Regional Office 7 Police Brigadier General Redrico Maranan.
Si Bermudez graduwado sa Philippine National Police Academy (PNPA) class of 2000 samtang si Atanacio sakop sa PNPA class of 1998.
Gipasigarbo ni Atanacio ang iyang mga nahimo sa kapulisan sa probinsiya sulod sa unom ka buwan.
Sa iyang panahon, nakalusad sila og 2,127 ka anti-illegal drug operation nga niresulta sa pagkasikop sa 2,775 ka mga drug suspect ug pagkasakmit sa P213.7 milyunes nga balor sa ilegal nga drugas.
Samtang nakahimo sab sila og 1,905 ka operations batok sa mga wanted persons nga nisangpot sa pagkasikop sa 2,061 ka mga pinangita sa balaod nga nalutsan og warrant of arrest sa lainlaing kaso.
Wala sab magpaulahi ang ilang kampanya batok illegal gambling sanglit nakahimo sila og 1,910 ka operations nga nisikop sa 3,117 ka mga sugarol.
Sa iyang termino gihingusgan sab ni Atanacio ang pagsakmit sa loose firearms sanglit naatol ang iyang paglingkod sa National and Local Election sa Mayo 12.
Nakasakmit sila og 1,526 ka mga armas nga walay lisensya samtang ang uban niini gi-surrender ngadto sa mga police station.
Si Atanacio kasamtangan nga gidestino sa Police Regional Office 7 ug nagpaabot sa assignment nga isangon kaniya.
Samtang ang nipuli kang Colonel Bermudez sa CIDG 7 mao si Police Lieutenant Colonel Angelo Nicolas. / AYB