Gipadayag ni Mexican superstar Canelo Alvarez nga andam na siyang makigharong ni American Terence Crawford alang sa sunod niyang tahas.
Hinuon, giklaro ni Alvarez nga nagdepende kini kon maayo ang resulta sa panagsabot kabahin sa pinansyal nga aspeto ug hasta sa umaabot niyang away.
Si Alvarez nakatakdang modepensa sa iyang World Boxing Council (WBC) ug World Boxing Organization (WBO) super middleweight (168 lbs) titles batok ni Puerto Rican Edgar Berlanga karong Septiyembre 14, 2024, sa T-Mobile Arena sa Las Vegas, USA.
Gipasabot ni Alvarez nga wala siya nabalaka kabahin sa kamanduan sa WBO nga paawayon si Crawford ni WBC/WBO junor middleweight king Sebastian Fundora.
Sa pagtuo ni Alvarez, mahan-ay ra gihapon ang ilang panagharong ni Crawford kon makadawat siya’y madanihong pinansyal nga tanyag.
Sa tan-aw ni Alvarez, sayon ra nga away ang iyang sagubangon batok ni Crawford, kinsa kanhi undisputed champion sa junior welterweight (140 lbs.) ug welterweight (147 lbs.) divisions.
Nagkanayon si Alvarez nga dili na makatay-og ang kumo ni Crawford sa mas bug-at nga timbang.
Gibasi ni Alvarez ang iyang pangagpas sa labing unang away ni Crawford sa junior middleweight (154) batok ni Israil Madrimov.
Nidaog man tuod si Crawford ning awaya pinaagi sa unanimous decision apan matod ni Alvarez, tataw nga wala kini nakapasakit ni Madrimov.
Matod ni Alvarez nga samot na nga dili makatay-og ang kumo ni Crawford sa super middleweight.
Taodtaod na sab nga nagtinguha si Crawford nga makig-away ni Alvarez apan karon lang nihatag og positibong reaksyon ang naulahi.
Si Alvarez adunay 61-2-2, 39KOs nga rekord samtang si Crawford naggunit og 41-0, 31KOs nga baraha. / ESL