Nihangyo ang legal counsel ni American Terence Crawford sa World Boxing Organization (WBO) nga lugwayan sila og dugang 10 ka mga adlaw sa paghan-ay sa panagharong nila ni Crawford ug WBO junior middleweight champion Sebastian Fundora.
Niadtong Agusto 28, 2024, ang WBO nihatag og kamanduan nga sulod sa 30 ka mga adlaw, kinahanglang magkasinabot ang duha ka mga kampo kon kanus-a ipahigayon ang away aron wala’y purse bid nga mahitabo.
Si Crawford, 37, kinsa kanhi undisputed champion sa junior welterweight ug welterweight divisions, kasamtangang maoy interim champion sa WBO junior middleweight.
Nakuha ni Crawford ang WBO junior middleweight interim title pinaagi sa unanimous decision nga daog batok ni Uzbekistan Israil Madrimov niadtong Agusto 3 sa Los Angeles.
Gitugtan una nga makaaway si Crawford alang sa interim title kay nagkinahanglan pa magpaalim si Fundora niadtong higayuna sa angol nga iyang nasinati sa iyang labing ulahing away.
Ang kampo ni Fundora niuyon sa hangyo sa kampo ni Crawford.
Ning maong kalambuan, aduna pa’y hangtod karong Oktubre 4 ang duha ka mga kampo aron magkasinabot kabahin sa ilang away. / ESL