Criminology student dakpan sa buy-bust

Criminology student dakpan sa buy-bust
SunStar Local News GPX

Hayan mabalda ang pagtu­on sa usa ka Criminology student human siya mapusasi atol sa buy-bust sa mga sakop sa Philippine Drug Enforcement Agency (PDEA-7) ug kapulisan.

Ang suspek giila nga si Dave Delmar Tanga-an, 23, ulitawo, taga-Sityo Bas, Barangay Perrelos, siyudad sa Carcar, Sugbo, giila nga priority target sa PDEA tungod kay high value individual (HVI).

Milampos ang PDEA-7 inabagan sa mga polis sa Carcar ubos sa pagdumala sa ilang team leader nga si IA 1- Investigator Agent 1 Jessie S Cabutotan, niadtong Huwebes sa gabii, Mayo 2 sa Sityo Bas, Perrelos, Carcar.

Ang poseur buyer nga PDEA 7 agent nigamit og bogus money nga P200,000 nga gipaibabwan og P500 nga bill alang sa pagpalit og pakete sa shabu.

Sa pagtuo nga nakahalin siya og bigtime, pusas diay ang gipasul-ob kaniya human natigayon ang transaksiyon.

Nakuha sa mga operatiba ang usa ka dakong putos sa gituohang shabu nga motimbang og 100 gramos nga dunay estimated average market value nga P680,000 lakip na ang buy bust-money, cellphone ug ubang mga ebidensya.

Matod pa ni IA 1 Cabutotan sa pakighinabi sa Superbalita Cebu, ang suspek idlas apan pinaagi sa abag sa ilang asset nadakpan.

Gikataho nga ang hurisdiksiyon ni Tanga-an sa iyang drug distribution/operation ang tibuok Carcar City.

Giingong sa dakbayan sa Sugbo magkuhaan og supply sa drugas si Tanga-an.

Nagkanayon si Cabutotan nga su’d sa usa ka buwan nilang gipanid-an ang operasyon sa suspek ug sa ilang pag-monitor nasuta nga makahalin og tag-100 ngadto sa 300 gramos sa shabu matag semana.

Napanglantawan sa PDEA7 nga sa pagkasikop ni Tanga-an dako ang makibhang sa supply sa shabu sa Carcar City. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph