Di na mopadayon sa pagtuon ang usa ka tinun-an sa Criminology nga giingong gikulata sa mga polis sa Police Station 4 sa Lapu-Lapu City Police Office (LCPO) human nasaypan nga mikawat og biseklita ug chainsaw.
Ang 20-anyos nga tinun-an sa Criminology miingon atol sa pakighinabi sa mga tigbalita nga dili na niya ipadayon ang iyang pagtuon sa maong kurso tungod sa nasinati nga pag-abuso sa pulisya.
“Dili na sir, way ayo mga polis sir, abusado,” matod sa biktima dihang gipangutana kon mopadayon ba siya sa iyang pagtuon niadtong Miyerkules, Oktubre 9, 2024
Ang biktima nga usa ka 2nd year college sa kursong Criminology mitug-an nga wala na siya makatungha sukad niadtong Sabado, Oktubre 5 human sa giingong gikulata sa mga polis diha sa police station niadtong Biyernes, Oktubre 4.
“Second year unta mam pero wa ko mu-eskuyla pag Sabado ma'am kay wa ko kadawat, wa ko kahimo sa activity nako,” matod sa biktima.
Sa Facebook post sa usa ka sakop sa pamilya sa biktima niadtong Sabado, Oktubre 5, ang estudyante nga giila nga si “Eric,” giakusahan nga nangawat og bisikleta ug chainsaw gikan sa panimalay diin siya nagtrabaho isip caretaker sukad sa edad pa og 9 anyos.
Samtang, si City Mayor Junard “Ahong” Chan, sa iyang Facebook post niadtong Dominggo, Oktubre 6, niingon nga iyang gimanduan ang LCPO sa paglusad og imbestigasyon sa usa ka insidente.
Sa taho sa SunStar Cebu niadtong Lunes, Oktubre 7, personal nga gibisita ni Chan ang tinun-an nga naa sa tambalanan aron mangayo og medikal nga tabang.
Sa pinakaulahing update niadtong Miyerkules, Oktubre 9, unom ka mga polis gikan sa Station 4 sa LCPO ang girelibuhan. / CDF