Gituohang dili gihapon makaduwa ang usa sa mga pambato sa Guam nga si Filipino-Guamanian Jericho Cruz batok sa South Korea sa knockout game alang sa inilugay og puwesto sa quarter-finals karong Martes, Agusto 12, 2025, sa 31st Fiba Asia Cup sa Jeddah.
Kini gumikan sa hamstring injury nga nasinati ni Cruz atol sa surpresang kadaugan sa Guam batok sa Syria, 82-73, sa ikaduha niining tahas sa bracket B sa group stage.
Ning sangkaa, si Cruz kinsa sakop sa San Miguel Beermen sa Philippine Basketball Association (NBA) maoy nangulo sa Guam pinaagi sa iyang 21 puntos lakip na niini ang lima ka three-pointers.
Apan tungod sa iyang nasinati nga angol, si Cruz kinsa napiling Finals MVP atol sa kalampusan sa Beermen sa niaging PBA Philippine Cup, wala na nakaduwa sa ikatulo ug katapusang duwa sa Guam sa group stage batok sa Japan niadtong Dominggo, Agusto 10.
Ning sangkaa, nanghinaot unta si Guam coach EJ Calvo nga maalim ra dayon si Cruz apan wala kini nahitabo.
Ang resulta, nasugamak ang Guam sa dakong kapildihan batok sa Japan, 63-102.
“Hamstring is a tough injury. And it’s unlikely he’ll be able to go with the treatment alone in the next two days,” matod ni Calvo nga napatik sa Spin.ph.
Ang Guam nakalusot lang hinuon gihapon sa group stage isip No. 3 team sa ilang bracket nga nagtukmod kanila sa knockout game batok sa South Korea nga maoy No. 2 sa bracket A.
Ang modaog tali sa Guam ug South Korea mao ang makigsangka sa China sa quarter-finals.
Ang China nakaderetso og sulod sa quarter-finals human nila nakuha ang No. 1 puwesto sa bracket C. / ESL