NAKAPABALAKA sa mga opisyal sa Kapitolyo ang ilang nadiskubrian sa Cebu South Bus Terminal (CSBT) human sa usa ka sorpresa nga inspeksyon niadtong Huwebes, Hulyo 10, 2025.
Ang inspection subay sa plano ni Gobernador Pamela Baricuatro nga ibalik ang manual ticketing system sa mga terminal sa bus sa Sugbo.
Tungod sa mga nadiskubrian, himuon ang pag-review sa operasyon sa pasilidad ug sa kontrobersyal nga automated ticketing system niini.
Si Baricuatro nimando nila ni Provincial Chief of Staff Paulo Uy ug Provincial Information Officer Ruben Licera nga mohimo og inspection aron masusi ang daghang kabalaka sa publiko bahin sa kahimtang sa CSBT.
Atol sa inspeksyon nakita ang nahulog nga debris, abugon nga tiles, nagkatag nga basura, ug dili maayong bentilasyon nga nakahatag og dako nga kalisud sa publiko.”
Kini nga mga isyu nakahatag og kahasol ug kabalaka sa kaluwasan sa adlaw-adlaw nga mga sumasakay.
Gisusi usab nila ni Uy ug Licera ang automated ticketing system sa CSBT nga gipadagan sa third-party provider nga Topline.
Atol sa usa ka miting niadtong Hulyo 7 uban sa gobernador, gisaway sa mga operator sa bus ang sistema.
Kini tungod kay di epektibo kay ang mga pasahero kinahanglan nga molinya og kaduha: una aron makapalit og tiket ug ipasusi ang tiket kon balido kini sa dili pa mosakay.
Tungod niini, gimando ni Baricuatro ang usa ka comprehensive assestment sa performance sa sistema atol sa peak ug off-peak hours.
Gitahasan usab sila Uy ug Licera sa pagpanguha og feedback gikan sa mga pasahero, drayber, ug staff sa terminal.
Ang mga nadiskubrian sa inspeksyon isumite kang Baricuatro sa iyang pagbalik gikan sa usa ka leadership training sa Manila sa Lunes, Hulyo 14.
Human niini, ipagawas sa publiko ang mga resulta, ug sundan kini sa aksyon base sa mga rekomendasyon.
Nianang Lunes, Hulyo 7, gipahibalo ni Baricuatro nga gikonsiderar sa Kagamhanang Probinsyal sa Sugbo ang pagbalik sa manual ticketing system sa north ug south bus terminals tungod sa gitaho nga mga kalangay ug kahasol sa publiko sa kasamtangan nga automated setup. / CDF