Nitunol ang Cebu Technological University (CTU) og Presidential Medallions ug dagkong cash incentives sa 10 ka top-performing nga nakapasar sa Licensure Examination for Teachers (LET) atol sa ilang unang "The Premier:Testimonial Night of Triumph and Excellence" nga gipahigayon niadtong Hunyo 27, 2025, sa usa ka hotel sa Dakbayan sa Mandaue isip selebrasyon sa academic excellence ug perseverance.
Nipasidungog ang maong kalihukan, nga unang higayon sa kasaysayan sa unibersidad, sa topnotchers sa March 2025 LET nga nagpakita sa dedikasyon sa CTU sa pagmugna og high-caliber educators alang sa tibuok nasod.
Nangulo sa seremonya si CTU President Dr. Joseph C. Pepito nga inubanan ni Vice President for Academic Affairs Dr. Reylan G. Capuno, college deans, campus directors, ug ubang university officials.
Gipasidunggan ang topnotchers dili lamang pinaagi sa Presidential Medallions ug Certificates of Recognition, apan apil sab ang dako nga cash incentives.
Si Jeanlyn Colipano sa CTU Danao Campus nga Top 1 passer, nakadawat sa labing taas nga pasidungog nga nagkantidad og P200,000, samtang ang siyam pa ka topnotchers nakadawat matag usa og P80,000.
Ang topnotchers sa March 2025 LET naggikan sa lain-laing mga campus sa CTU.
Alang sa Secondary Level, si Jeanlyn Guinita Colipano gikan sa CTU-Danao nakakuha sa Top 1 nga pwesto nga may rating nga 93.80%. Si Marie Jessa Lisondra Montemayor gikan sa CTU-Main nakakuha sa Top 8 nga pwesto nga adunay 92.40%, kauban ni Nelia Soler Gutierrez usab gikan sa CTU-Main, ug si Sheen Sarsaba Montezon gikan sa CTU-Argao nga nakaparehas og rating nga 92.00%, maong nakuha nila ang Top 10 nga pwesto.
Alang sa Elementary Level, si Juliana Mae Berame Magtagad gikan sa CTU-Main nakab-ot ang Top 7 nga pwesto nga may rating nga 93.20%, Ricamae Bentoy de los Reyes gikan sa CTU-Carmen ug si Jean Rose Mamac Lamela gikan sa CTU-Main nakakuha og Top 8, parehas og rating nga 93.00%. Si Louiss Arc Tura Degamo gikan sa CTU-Main nahimong Top 9 nga adunay 92.80%, samtang si Mary Angeli Imperial del Mar gikan sa CTU-Moalboal ug si Rhea Nicole Muaña Hoyo-a gikan sa CTU-Main naa sa Top 10 nga pwesto nga parehas og rating nga 92.60%.
“This is not just a celebration of rankings, but of stories, sacrifices, and the shared journey of our university towards excellence. These topnotchers are a testament to what can be achieved when dreams are supported with determination and faith,” matod ni Dr. Pepito atol sa iyang keynote address.
Gipasidunggan sa pamunuan sa unibersidad ang ilang padayon nga kalampusan sa mga national licensure exams gumikan sa ilang "secret ingredients" nga mao ang rigorous academic alignment, faculty development programs, ug student-centered policies.
Ang CTU nagpatuman og tracer studies ug nagtukod og university placement office aron matabangan ang mga graduate nga makakita og sa trabaho, samtang gipalig-on sab ang kultura sa suporta, motibasyon, ugwell-being sa tanang campus.
Atol sa kalihukan, ang mga topnotcher ug piniling ginikanan nipaambit sa ilang makapadasig nga mga estorya sa kalampusan nga nagpamatuod sa dedikasyon, kaisog, ug gahum sa dekalidad nga edukasyon.
Usa sa labing emosyonal nga bahin mao ang pamahayag sa inahan ni Colipano, usa ka solo parent, nga nisaysay sa ilang panaw nga puno sa kalisod, pagtuo, ug paglahutay.
“Daghang salamat. Wala gyud ninyo gikawang ang among paningkamot,” matod niini.
Gisiguro sab sa presidente sa unibersidad nga kini nga tribute dili lang usa ka higayon nga kalihukan.
“This would be our legacy to continue. We will ask the Board of Regents to make this a regular university activity to honor our achievers annually,” pagdeklarar ni Dr. Pepito.
Uban sa mga campus sa tibuok Sugbo ug nagkadako nga rekord sa mga top-performing graduates, determinado ang CTU nga palig-unon ang ilang skwelahan isip usa ka premier science and technology university dili lamang sa Pilipinas kondili sa tibuok Southeast Asia.
Kining mahinungdanong kalihukan wala lamang nagpasidungog sa indibiduwal nga kahanas apan nagpasiugda sab sa walay puas nga paningkamot sa CTU aron makab-ot ang tumong nga ADVANCE nga nagtinguha sa akademikong kabag-ohan, global recognition, ug makahulugang kalambuan sa komunidad. / BJC