Miabli na sa Mactan ang kan-anan ni Gordon Ramsay, ang langyaw nga banggiitang chef nga kusog kaayo mangasaba sa programa sa telebisyon diin magtigi ang mga chef alang sa dakung premyo.
Bag-o pa lang, nagkuyog mis akong pamilya sa iyang kan-anan didtos Newport City sa Manila. Among gi-order ang ilang Beef Wellington Steak, Beef Tartare, Lamb Steak, ug Fish and Chips. Ug imbis kan-on, mi-order mig French Fries, Mashed Potato ug Marcaroni and Cheese. Red Wine ang among padangog.
Lami ang malasadong karne sa Beef Wellington. Daw kinilaw ang nipis ug humok nga Beef Tartare. Wa gyuy langsa ang Lamb Steak ug lami sab ang Fish and Chips.
Ang ubang putahe sama sa French Fries, aw, parehas ra pud sa mga natilawan nakos uban. Samtang tanlas ang bino nga gikan sa Bordeaux, France.
Sosyal ang lugar, disco ang tukar ug medyo ngitngit ang palibot. Adunahan og dagway ang mga customer, sagad mga langyaw. Paspas ang serbisyo ug ang mga trabahante nga larino moiningles andam kaayo mobuluntaryo sa pagkamaniniyot.
Apan kon akoy papilion, wa gyud gihapoy makalupig sa pagkaong Binisaya, mga lutuonon ni Mama matag adlaw ug mga espesyal nga putahe nga andamon ni Lola kon naay okasyon.
Alang natong mga Bisaya, naa ba guy makalabaw sa kalami sa sabaw sa Isdang Tinuwa inig pamahaw? Ug di ba, lami man gyud ang Utan Bisaya nga sinubakan og gisipadsipad nga Sinugbang Anduhaw, labi na inig panihapon nga ting-uwan?
Wa pa ni labot sa tingpaniudto nga Baboy Inasal, Dugo-dugo, Tinolang Manok, Paklay, Kinilaw nga Bolinaw ug Inun-unang Bilong-bilong. Naa pay Dinuldog, Humba, Pansit ug Tinunoang Monggos. Pun-an pas pangpagana nga Ginamos, Tinabal, Labtingaw o Inag-ag nga Bulad nga Lawlaw nga parisan ug Binuyok nga Mais nga #16.
Abi ninyo, tinuod gyud nga acquired taste o depende sa anad ang tanang pagkaon.
Busa, di gyud ta angayan nga masina sa mga pagkaong naas telebisyon o Facebook, labi na ang mga langyawng putahe. Nag-ayo lang ang hitsura anang uban, pero basig di diay nato matulon kay wa ta maanad sa lami o alimyon.
Mao nga bisag nindot tinuod didtos lugar ni Ramsay, di gihapon nako ikabaylo ang larangan sa Pasil, siomayan sa Tisa, pungko-pungko sa may Fuente, bakaretahan sa Talamban, bakasihan sa Cordova, ug ngohiongan sa Guadalupe.
Kay wa man gyuy makatandi sa unsay atong naandan, na hala, ilaha nalang nas Ramsay. Ari lang gihapon kos linuto gikan sa kabus namo nga abuhan.