Motangkod na og 505 ka tuig ang Kadaugan sa Mactan karong Lunes, Abril 27, 2026.
Dugay naman tinuod to, apan sayod ba mo nga aduna pa gihapoy mga nagtuo nga nagpabilin pa gihapon si Lapulapu dinhi nato karon?
Matod sa katigulangan, si Lapulapu hanas kaayo sa hait nga hinagiban nga gitawag og Kampilan. Mao ni ang daku nga sundang nga gigamit niya pagtigbas ni Fernando Magallanes niadtong 1521.
Si Lapulapu gibansay niining kampilan sa iyang amahan nga si Mangal, ang kanhi Hari sa Maktan.
Niadtong ikaduhang gubat sa kalibutan, nahimong sungog kining maong istorya tungod kay ang mga taga-laing dapit mokomedya man sa mga taga Lungsod sa Opon nga angay nilang ingnon si Lapu-lapu nga mobalik aron patyon ang kasundaluhang Hapones sa Pilipinas.
Mopahiyom lang ang mga taga-Opon, apan sa ilawom sa ilang kasing-kasing, nagpabilin nga buhi ang maong bayani sa kanhiay’ng panahon.
Diin mang dapita ug sa unsa mang paagiha nga nabuhi si Lapu-lapu?
Segun sa mga estorya, si Lapu-lapu ug ang iyang amahan nga si Mangal atong mabati sa matag higayon nga adunay kusog nga mga dalugdog ug kilat dinha sa dagat palibot sa Mactan.
Ang mga dalugdog kuno maoy tingog sa panagpingki sa ilang mga kampilan samtang sila nagbansay-bansay. Ug ang mga kilat sab maoy kislab sa matag panagbangga sa puthaw nilang kampilan, hinungdan nga mosiga kini nga daw dagitab gikan sa kahitas-an.
Busa, niadtong panahon sa gubat, ang diwa ni Lapulapu nakita diay niadto dinha kinabuhi sa matag gerilya nga misukol batok sa mga Hapon. Kay ang matag pitik sa ilang dughan mao may pulso nga naghatag og kinabuhi sa gugma alang sa nasudnong kaugalingnan.
Tam-is pamation, unsa?
Mao nga taliwa sa mga panghitabo karon, hugot gihapon kong nagtuo nga pinaagi sa kaisog ug gugma sa yutawhan nga gipakita kanato ni Lapulapu, mabuntog ra gihapon nato kanang mga tinguha sa laing nasud nga sakupon ang mga dapit nga nahilakip sa atong teritoryo.
Mabuhi si Lapulapu. Mabuhi ang Pilipinas
