Gapakita ni Stephen Curry kon unsa ang abilidad sa beterano nga player labi na sa panahon sa playoffs ug iyang giaswat ang Golden State Warriors batok Houston Rockets, 104-93, para makuha ang 2-1 lead sa National Basketball Association (NBA) first-round playoff series kagahapon, Abril 27 (PH time) didto sa San Francisco.
Nagdilaab ang kamot ni Curry mipahagsa kini og 36 puntos, siyam ka assists ug pito ka rebounds para sa Warriors, kinsa miduwa nga wala ang usa ka pambato nga si Jimmy Butler.
“To play 41 minutes against that kind of defense, to have a slow start and then find his rhythm, which we have seen him do countless times over the years, to hit big shots, to only turn it over twice against that kind of pressure, he was brilliant," saysay ni Warriors head coach Steve Kerr.
Si Buddy Hield miamot og 17 puntos gikan sa bench, samtang si Gary Payton II mitunol og 11 sa iyang 16 puntos sa fourth quarter para sa Warriors.
“To see everyone step up in his absence was huge,” matod ni Draymond Green.
Ang Game 4 sa best-of-seven series takda karong Martes (PH time) sa Chase Center. Ang pangutana sa kadaghanan kon makaduwa na ba si Butler kinsa dunay pelvic injury ug deep gluteal muscle contusion human kini matagak sa Game 2.
“You’ve got one task,” matod ni Curry. “Hopefully he’s back next game, or if he’s not we can still play at a high level, we can win a tough, physical playoff game. I think we all know, we’re trying to win 14 more of these. We need Jimmy to do that.”
Matod ni Kerr nga didto sila nakabentaha sa second quarter diin miinit pud ang kamot sa 37-anyos nga si Curry. Nahatagan og igong espasyo si Curry sa iyang teammates ug wa kini mopakyas kanila.
Si Curry naa nay 4,053 career playoff points ug iyang naapsan si Tony Parker (4,045) para sa ika-10 sa NBA history. / RSC