NADAKPAN sa National Bureau of Investigation (NBI) Cebu District Office ang usa ka lalaki, pangalan gipugngan, nga usa ka custom broker sa Dakbayan sa Sugbo human kini giingong nangilad sa magti-ayong negosyante nga taga Dakbayan sa Talisay.
Subay sa imbestigasyon sa NBI-Cebdo, giingong dugay nang nagpaabot ang magtiayon sa ilang container nga niabot na sa pantalan sa Sugbo.
Ang maong container maoy gikargahan sa mga chop-chop nga parte sa mga sakyanan nga giingong i-display sa auto shop sa Siyudad sa Talisay.
Giingong ang magtiayon nibayad na sa makadaghang higayon sa maong custom broker apan gilangay-langay ang pag-release sa ilang mga butang.
Ning uwahi, nakabayad sila og moabot sa P163,000 sa maong broker human kini nidemanda sa maong kantidad, apan wala gihapon ma-release ang maong kargamento sa mga reklamante.
Hinungdan nga nangayo na sila og tabang sa NBI aron masikop ang maong tawo.
Sa kasamtangan giduso na sa piskalya ang kaso. /ANV