CVIRAA athletes, coaches, staff gipahimangnuan sa grabeng kainit

CVIRAA athletes, coaches, staff
gipahimangnuan sa grabeng kainit
Tampo gikan ni John Velez Photography

Sa pagpahigayon sa Central Visayas Regional Athletic Association (CVIRAA) sports meet, ang mga partisipante ug tumatan-aw kinahanglang mangandam sa kaugalingon sa grabeng kainit sa temperatura.

Si Jhomer Eclarino, weather specialist sa Visayas division sa Philippine Atmospheric, Geophysical, and Astronomical Services Administration (Pagasa), nipagawas og advisories ngadto sa mga partisipante ug sa kinatibuk-ang publiko taliwala sa nagpadayon nga sporting events.

“Generally, init ug igang nga panahon ang padayon nga atong weather condition,” si Eclarino sa pakighinabi sa SunStar Cebu niadtong Dominggo, Mayo 5, 2024.

Matod niya nga ang Sugbo padayon nga makasinati og heat index ubos sa extreme caution category, nga posible moresulta sa heat cramps ug heat exhaustion, ug ang dugang kalihukan mahimo’ng moresulta sa heatstroke.

Base sa ilang data base nga karong semanaha, ang labing taas nga surface air temperature nga posible’ng matala kay anaa sa 33 deg­rees Celsius.

Dugang pa, alang sa heat index, sa sunod nga duha ka adlaw, ilang gipanglantawan nga kini moabot ngadto sa 37 o 38 degrees Celsius.

Si Eclarino niingon nga gamay ra ang tsansa sa pag-agi og isolated nga pag-ulan, apan dili kini magpadayon. Dugang pa niya nga wala nay laing nagpatigbabaw nga weather system gawas lang sa nagpadayong Easterlies nga nakapasamot usab sa alindanga nga kahimtang.

Sa laing bahin, iyang gipahinumdoman ang mga partisipante sa CVIRAA nga magpabilin nga hydrated, mangita og landong kon gikinahanglan, ug malikayan ang dugay nga pagkabuwad sa adlaw.

Ingon man magmatngon sa mga timailhan sa sakit nga may kalabutan sa kainit ug sundon ang mga tambag gikan sa Department of Health (DOH).

Sa sayo pa, si Dr. Eugenia Mercedes Cañal, regional epidemiologist gikan sa DOH 7, niawhag sa publiko nga likayan ang paggawas sa gawas tali sa alas 9 sa buntag hangtod sa alas 4 sa hapon, ilabi na sa peak hours kon ang heat index moabot sa pinakataas nga lebel.

Girekomendar usab ni Cañal ang paggamit og sunscreen kon mosuroy sa gawas ug gipasiugda ang kamahinungdanon sa pagpabilin nga hydrated pinaagi sa pag-inom og daghang tubig.

Uban sa mga temperatura nga gilauman nga magpabilin nga taas sa tibuok semana, ang mga organizer ug mga opisyal hugot nga nag-monitor sa kaayuhan sa mga partisipante ug nagpatuman sa precautionary nga mga lakang aron masiguro ang ilang kaluwasan.

Si Cebu City Sports Commission Chairman John Pages niingon sa press conference sa miaging semana, walay outdoor games nga ipahigayon tali sa alas 9 sa buntag hangtod sa alas 3 sa hapon atol sa CVIRAA sports meet nga mahitabo hangtod Mayo 9.

Matod niya nga unahon niini ang kaluwasan ug kahimsog sa student-athletes ug coaching staff, mahimo’ng magsugod na sila sa pagpahigayon sa outdoor sporting events sa alas 5:30 sa buntag.

Sa chat message sa SunStar Cebu atol sa opening day niadtong Sabado, Mayo 4, si Pages niingon nga nagsugod sila sa alas 5:30 sa buntag ug nakahimo na sila og mga kompetisyon alang sa lima ka sports, lakip na ang athletics, gymnastics, baseball, softball, ug mga panghitabo alang sa para-games.

Gipaabot sa Siyudad ang 12,000 ka partisipante gikan sa 20 ka schools division sa rehiyon alang sa sporting meet, diin 8,500 niini mga student-athletes, uban sa mga kuyog nga naglangkob sa technical committee ug coaching staff. / KJF

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph