Maglisod og kakita sa adlaw ang Sugbo ug makasinati og pagpanag-om ug dalugdog karong semanaha.
Kini ang gipahibalo sa Philippine Atmospheric, Geophysical and Astronomical Services Administration (Pagasa) Visayas sa ilang lima ka adlaw nga forecast.
Matod ni Pagasa Mactan weather specialist Ana Dumdum, sa usa ka interbyu niadtong Lunes, Hulyo 21, 2025, nga bisan pa niubos ang kahigayunan sa pag-ulan kumpara sa miaging semana, posibleng aduna gihapoy pagkausab sa panahon, ilabi na sa hapon o sa gabii.
Giawhag ang publiko nga dili mokompiyansa ug magpabilin nga alerto sa posibleng kausaban sa panahon.
Base sa lima ka adlaw nga regional outlook nga giisyu niadtong Lunes, ang temperatura sa Sugbo magkalahi gikan sa 25 degrees Celsius ngadto sa 32 degrees Celsius gikan sa Lunes hangtod sa Biyernes, Hulyo 25, nga adunay hinay ngadto sa kasarangan nga hangin gikan sa habagatan-kasadpan ug hinay ngadto sa kasarangan nga kahimtang sa kabaybayonan.
Ang habagat o southwest monsoon, padayon nga makaapekto sa kasadpang bahin sa Visayas nga nakatampo sa pagdag-om sa rehiyon, lakip na sa Sugbo.
Gilauman nga magpadayon ang pag-agos sa monsoon sa mosunod nga mga adlaw nga magpabilin ang init ug humid nga panahon. / Allyssa Doncillo, HNU Intern