Makasinati ang Sugbo og dag-om ngadto sa hingpit nga magtabon sa kalangitan sa ikaupat nga semana sa Agusto, ilabi na tungod sa nagpadayon nga epikto sa habagat, matod sa state weather bureau.
Narekord ang kusog nga uwan ug pagbaha niadtong Biyernes sa gabii, Agusto 15, 2025, ilabi na sa Central Cebu, nga niresulta sa mas kusog nga habagat.
Sa interview sa SunStar Cebu, si Mark Gales, usa ka weather specialist sa Philippine Atmospheric, Geophysical, and Astronomical Administration Services (PAGASA), niingon nga ang partly cloudy ngadto sa dag-om nga kalangitan, uban sa posibilidad sa kalit nga pagdag-om ug mga pagpanugdog, maoy gilauman sa tibuok semana.
Niarang-arang ang kahimtang sa panahon sugod niadtong Sabado, AgUsto 16.
Matod niya nga padayon gihapon nga mahitabo ang panagsa nga pag-uwan ug pagbaha, ug ang uban niini mahimong molungtad og dugay.
Giawhag ni Gales ang mga lumulupyo nga duol sa sapa ug sa mga dapit nga daling bahaon nga ibalhin ang ilang mga sakyanan gikan sa mga agianan sa tubig ug mobakwit kon mahimo tungod sa kusog nga pag-ulan.
Way gilauman nga kusog nga hangin sa kadagatan ug luwas ang pagbiyahe sa mga barko.
Apan ang mga pagpanugdog mahimong magdala og kalit nga kusog nga hangin o unos maong baluron ang kadagatan.
Usa ka low-pressure area (LPA) ang nakita sa West Philippine Sea, gawas sa Philippine Area of Responsibility (PAR) niadtong Sabado, Agusto 16. / DPC