Mopatuman og bag-ong traffic scheme ang Dakbayan sa Mandaue diha sa U.N. Avenue-M.C. Briones Intersection sugod sa buwan sa Abril.
Mga motorista nga moagi sa intersection sa U.N. Avenue ug M.C. Briones Street atubangan sa Pacific Mall, makapaabot og traffic overhaul sunod buwan.
Ang kagamhanan sa siyudad mousab sa bag-ong traffic scheme nunot sa geometric improvements nga gitumong sa pagpaluag sa traffic sa maong dapit.
Niadtong Marso 13, sila si Assistant City Administrator Architect Florentino Nimor, Traffic Enforcement Agency of Mandaue (Team) head Hyll Retuya ug ang project supplier nga si Timothy Ong nisusi sa kalambuan sa nagpadayon nga road enhancements.
Matapos unta niadtong buwan sa Pebrero ang maong proyekto apan nalangay tungod sa pagsige og uwan.
Naglaom ang mga opisyal nga hingpit nang matapos ang proyekto sa ikatulong semana sa Abril.
Usa sa mga kausaban nga himuon mao ang pagbalhin sa pedestrian refuge island ug ang traffic light system sa kilid sa mga intersection.
Nagpadayon ang pagsemento sa dan ug sundan sa asphalt overlaying ug ang pagdugang og lane markings.
Aron sa pagpalambo sa dagan sa mga sakyanan, ang stop line sa mga intersection iatras aron tugotan ang mga dagkong sakyanan nga sayon makaliko.
Ang bag-ong sistema mopaila sa upat ka southbound lanes, duha paingon sa Cebu City ug laing duha gitumong sa left-turn lanes alang sa traffic paingon sa Lapu-Lapu City.
Agi og dugang, tanang mga sakyanan paingon sa Consolacion ug northern Mandaue i-reroute aron mogamit sa tulay sa Butuanon River, paingon sa M.C. Briones Street.
Kining maong two-lane bridge kaniadto gidesinyo lang sa mga sakyanan gikan sa Lapu-Lapu City. / CAV