Anaay tulo ka mga Pinoy nga cardinal electors ang papal conclave karong tuiga.
Mao kini ang labing daghang mga representante sa Pilipinas sa kasaysayan.
Sa report sa CBCP News, ang presensiya nila ni Cardinals Luis Antonio Tagle, Jose Advincula, ug Pablo Virgilio David sa umaabot nga ika-267 nga piniliay sa Santo Papa maoy labing daghan sa kasaysayan sa nasod.
“This marks a historic first as previous papal elections included only one or two Filipino princes of the Church,” matod sa CBCP News, ang opisyal nga news agency sa Catholic Bishops Conference of the Philippines (CBCP).
Naidtong 1963 si Manila Archbishop Cardinal Rufino Santos, kinsa maoy unang Filipino cardinal, ang nag-inusarang Filipino atol sa pagkapili ni Pope Paul VI.
Sa misunod nga duha ka conclave sa Santo Papa, pareho niadtong 1978, si Cardinals Jaime Sin sa Manila ug Julio Rosales sa Cebu usa sa mga mipili ni Pope John Paul I ug John Paul II.
Sa mga nakalabay, tag-usa ra ka Filipino cardinal ang mitambong sa 2005 nga piniliay ni Pope Benedict XVI nga si Cebu Archbishop Cardinal Ricardo Vidal; ug sa 2013 conclave alang kang Pope Francis si Manila Archbishop Cardinal Luis Antonio Tagle.
Ang papal conclave gikatakda nga opisyal nga ablihan sa Mayo 7 pinaagi sa "Pro Eligendo Romano Pontifice" nga Misa sa alas 10 sa buntag sa St. Peter's Basilica.
Pagka-alas 4:30 sa hapon, ang mga cardinal electors mosulod sa Sistine Chapel samtang mag-ampo sa Balaang Espiritu sa paggiya sa ilang pagdesisyon.