TRABAHUON sa Dakay Construction ang Cebu City Medical Center (CCMC) Phase 5 human maoy nakadaog sa bidding sa P700 milyones nga kontrata sa kagamhanan sa Dakbayan sa Sugbo.
Opisyal nga gipahibalo ni outgoing Cebu City Mayor Raymond Alvin Garcia sa usa ka press conference sa Biyernes, Hunyo 27, 2025, nga sugdan na ang pagtukod sa Phase 5 sa CCMC.
Kini nga hugna naglakip sa pagtukod sa ikatulo ngadto sa ikapitong andana sa building sa ospital.
Giklaro ni Garcia nga way apil niini ang mga ekipo sa ospital.
Gipirmahan ang kontrata ni Garcia isip representante sa kagamhanan sa Siyudad sa Sugbo ug ni Engr. Pericles Dakay sa kompanya sa konstruksyon niadtong Hunyo 26, 2025.
Nahitabo ang bidding niadtong Disyembre 23, 2024.
Ang proyekto gikatakda nga sugdan sulod sa pito ka adlaw gikan sa petsa sa pag-isyu ug pagkadawat sa “notice to proceed.”
Wala gisulti ni Garcia kon kanus-a gyud magsugod ang konstruksyon apan namatikdan niya nga usa ka notice to proceed ang na-isyu na.
Kining nalangay nga publikong ospital gilauman nga mahuman sulod sa 240 ka adlaw, o gibana-bana nga walo ka bulan.
Sumala sa dokumento, mahimong tapuson sa kagamhanan sa Siyudad ang kontrata kon ang kontraktor dili makapakita og makatagbaw nga trabaho ug nakasinati na og negatibong pagkalangan nga 15 porsyento o labaw pa.
Mahimo usab tapuson ang kontrata kon ang kontraktor malangay sa sobra sa 7 ka adlaw sa bisan unsang hugna sa proyekto.
Malaumon si Garcia nga mahuman ang proyekto sa saktong oras, basta way mga pagkalangan sa panahon sa konstruksyon.
Matod ni Lowell Corminal, pangulo sa Department of Engineering and Public Works (DEPW), nga mokabat sa P1.138 bilyones ang nagasto alang sa civil works sa CCMC.
Gibutyag ni Corminal nga adunay labing menos lima ka hugna sa pagtukod sa CCMC sukad pa niadtong 2014, uban sa Phase 1 (P566 milyones); Phase 1.1 (P36 milyones); Phase 2 (P299 milyones); Phase 3 (P99 milyones) ug Phase 4 (P136 milyones ang gipagawas gikan sa P916 milyones nga kontrata).
Ang Phase 5 usa ka proyekto kaniadto uban sa kontraktor nga M.E. Sicat Construction, apan gitapos niadtong Nobyembre 2022 tungod sa mga pagkalangan.
Gigahinan sa siyudad og P210 milyones alang sa ikawalo hangtod ikapulo nga andana sa CCMC. Gihangyo kini sa executive department sa Supplemental Budget 1, ug giaprobahan sa konseho sa niadtong Marso 2025. / JPS, Necolyn Claire Balansag, CNU Intern