Map of Pinamungajan, Cebu.
Map of Pinamungajan, Cebu. (Google maps)

Dalaga gipatay, gitabunan og unas sa saging

Naukay ang mga lumolupyo sa bukirang bahin sa Purok Cacao, Barangay Camugao, lungsod sa Pinamungajan, alas 12:00 sa udto, Lunes, Enero 15, 2024, dihang usa ka dalaga napalgan nga patay sa kasagingan nga gitabunan og mga unas sa saging.

Ang biktima giila nga si Jocelyn Caparida Samillon, 21, dalaga, lumolupyo sa naasoy nga dapit.

Sa pakighinabi sa Superbalita Cebu kang Police Maj. Gilfred Baroman, hepe sa kapulisan sa Pinamungajan, nasayran nga ang biktima gikan sa disko sa piyesta sa Barangay Anapog sa maong lungsod nga silingang dapit sa Camugao.

Matod ni Baroman, may nakakita sa biktima nga kuyog sa iyang suod nga kaliwat nga si Jimboy Pasacan, 18, pauli sa ilang dapit gikan sa disko.

Apan wa na igkita ang ma­ong batan-on sa ilang Purok Cacao human sa hitabo.

Si Baroman nagkanayon nga sa ilang pagsubay pinaagi sa ilang nakuhang impormasyon sa posibling gitagoan sa suspek, didto na nila matul­tuli sa Barangay Bitoon, lungsod sa Dumanjug ang suspek sa balay sa kaliwat sa amahan niini.

Ang suspek nagdala og bag padulong na unta mosibat agi sa pantalan sa Tangil padulong sa isla sa Negros.

Si Baroman nagkanayon nga sa iyang pagpangutana sa suspek kon nganong iyang gipatay ang biktima, kini nitubag nga nahiubos siya sa biktima kay siya gipasanginlan nga nangawat.

Matod niya nga sa iyang kasuko, iyang gisumbag ug gituok ang biktima hangtod nga namatay.

Matod ni Baroman nga mokuha pa sila og dugang mga impormasyon sa habig sa mga ginikanan sa biktima kon unsa gyud ang nasuk-an sa suspek.

Mahitungod sa anggulo sa rape, kini usa sa ilang iapil sa imbestigasyon ug masayran kini pinaagi sa autopsy sa lawas sa biktima.

Apan nasuta sa pagtan-aw sa PNP Scene of the Crime Ope­ration (Soco)sa lawas sa biktima, ang short pants ug ang iyang sapot wa mahubo.

Related Stories

No stories found.
SunStar Publishing Inc.
www.sunstar.com.ph