Samad pinulisan sa tiyan ang naangkon sa 38 nga babaye human gipusil sa iyang kapuyo gumikan sa selos niadtong kadlawon, Sabado, Septiyembre 21, 2024 sa Barangay Yati, Lungsod sa Liloan, Sugbo.
Ang biktima gitago sa alyas nga Jovy samtang ang suspek nga iyang kapuyo giila nga si Nadz, 35.
Sa pasiunang imbistigasyon sa kapulisan sa Liloan ubos sa pagdumala ni PMAJ Charlie Santiago nga adunay nagpahibawo sa ilang buhatan nga nakadungog og buto sa armas sud sa giabangan nga balay sa duruha.
Sa pagrespondi sa mga polis sa Liloan naabtan ang biktima nga nagkadugo samtang ang suspek nakasibat.
Butyag sa biktima nga hubog ang iyang kapuyo ug gipasanginlan siya nga adunay laing laki nga gikabuangan hinungdan nga mitumaw ang panaglalis ug nahitabo ang pagpamusil.
Ang biktima ang gidala sa ospital sa Cebu City samtang padayon pa nga gipangita ang suspek. / DVG