Tanghaga pa sa kapulisan ang motibo sa pagpusil patay sa usa ka 14 anyos nga dalagita nga tinun-an sa usa ka tunghaan sa dakbayan sa Talisay.
Ang biktima nga si Jacquilene Reponte nga nakaangkon og samad pinusilan sa ulo patay nang nidangat sa Cebu South Medical Center sa Dakbayan sa Sugbo human gipusil sa wala pa mailhing mamumuno alas 9:40 sa buntag sa Biyernes, Abril 26, 2024 sulod sa giabangang balay sa VH Garces St., Barangay Cansojong, dakbayan sa Talisay.
Sigun sa igsuon nga babaye sa biktima nga samtang nag-module ang biktima sulod sa ilang balay, kalit lang nga dunay tawo nga nisulod ug nipusil sa iyang manghod sa way igong hinungdan.
Dali nga misibat ang gunman samtang gitabangan sa pagdala ang biktima sa tambalanan apan wala na makaabot nga buhi.
Atol ning pagsuwat, ang kapulisan duna nay person of interest apan wala na mohatag pa sila og dugang mga detalye.
Sa interbyo sa GMA 7 Balitang Bisdak, ang inahan ni Jacquilene nga si Evelyn, niingon nga nalambigit sila sa kaso sa ilegal nga drugas. Nabilanggo na siya sa kaso sa illegal drugs ingon man ang iyang bana.
Nakagawas siya apan ang iyang bana namatay sulod sa bilanggoan.
Ang maguwang sa biktima on probation usab gihapon sa illegal drugs.
Matod sa Talisay City Police usa kini sa mga anggulo nga ilang gitan-aw.