Patay nang nalandig sa tambalanan ang 12 anyos nga dalagita samtang na-angol ang iyang inahan nga biktima sa hit-and-run sa national highway sa Barangay Poblacion, lungsod sa Alcantara, habagatang Sugbo, alas 2:39 sa hapon, Dominggo, Enero 26, 2025.
Ang mga biktima mao sila si Xiane Julia, 12, anak, ug Edwinda Llenos, 38, taga Barangay Poblacion, Alcantara.
Ang duha sakay og motorsiklo nga gimaneho sa inahan apan pag-abot sa naasoy nga dapit, nadasmagan sila sa usa ka Isuzu Forward nga wala mohunong aron pagtabang sa mga biktima.
Sa pakisusi sa Superbalita Cebu, ang mga biktima mopadulong sa lungsod sa Moalboal ug tungod sa kakusog sa impact, ang inahan ug anak nangalagpot ug nitugpa sa sementado nga bahin sa dan hinungdang sa grabeng kadaot nga ilang naangkon.
Ang mga sakop sa Alcantara Municipal Disaster Risk Reduction Management Office (MDRRMO) mao ang nidala sa mga biktima ngadto sa Badian District Hospital, apan ang 12 anyos nga dalagita ang gideklarar sa attending physician nga dead on arrival.
Samtang, ang drayber sa Isuzu Forward nga si Emmanuel Villahermosa Sibla, 55, minyo, ug taga Barangay Paril, lungsod sa Barili nadakpan human sa ginukdanay sa kapulisan sa Alcantara sa national highway sa Barangay Palanas sa samang lungsod.
Ang drayber gibalhog na sa bilanggoan sa Alcantara ug mag-atubang og kasong reckless imprudence resulting in homicide, physical injury and damage to property.
Dugang pa, ang kaso sa drayber mabug-atan pa tungod sa pagbiya sa iyang mga biktima o pag-hit-and-run.