SA nilabay nga tulo ka ma-yor nga nagdumala sa Dakbayan sa Sugbo, kanunay nga nataligam-an ang panawagan sa Barangay Inayawan nga maaspalto ang gubaon kaayong kadalanan.
Gikan ni anhing Mayor Edgar Labella, kanhi Mayor Michael Rama, ug kanhi Mayor Raymond Alvin Garcia, wala paminawa ang hangyo ni Kapitan Atty. Kirk Bryan Jaca Repollo aron aspaltuhon ang kadalanan sa barangay.
Ang bag-ong mayor nga si Engr. Nestor Archival maoy nakatuman sa damgo sa mga Inayawnon nga mahapsay na ang kadalanan gikan sa mga libaong.
Niadtong Agusto 4, 2025, gisugdan ang pag-aspalto sa kadalanan nga nagpadayon pa hangtod kagahapon.
“Dako kaayo atong pasalamat nga natagaan na gayud kini'g pagtagad human nga pipila ka tuig nga dugay kaayo kitang wala matagad sa Cebu City Government. Sa niaging mga katuigan, daghan kaayo'ng moingon nga sila ang point person sa request tungod kay sila ang duol sa taga City Hall pero daghan gihapong serbisyo ang wala mahatag,” tipik sa Facebook post ni Kapitan Repollo.
Ang kapitan mapasalamaton kaayo ni Mayor Archival ug Bise Mayor Tomas Osmeña tungod sa pagtubag sa hangyo sa mga taga Inayawan.
Daghan ang nag-ingon nga wa matagad ang hangyo ni Repollo kaniadto tungod kay di man siya kaalyado sa City Hall.
Sa miaging eleksyon, si Repollo ra ang bugtong kapitan sa south district nga nibarog sa Bando Osmena Pundok Kauswagan (BOPK).
Daghan ang nagtuo nga ang nindot na nga kadalanan sa Inayawan maoy ganti sa BOPK alang sa mga Inayawnon. / VLM