Dalogdog: Protesta sa Sona malinawon

Gihulagway sa kapulisan sa dakbayan sa Sugbo nga malinawon ug hapsay ang gilusad nga lihok-protesta sa mga militanteng pundok sa wala pa ang State of the Nation Address (Sona) ni Presidente Ferdinand Marcos Jr. sa Lunes sa buntag, Hulyo 22, 2024.

Matod ni Police Colonel Ireneo Dalogdog, hepe sa kapulisan sa dakbayan sa Sugbo, nga ilang gi-monitor ang gilusad nga rally sa cause-oriented groups gikan sa Fuente Osmeña Circle paingon sa Dalan Colon diin didto gipahigayon ang ilang programa.

Nagpasalamat si Dalogdog nga malinawon ra ang gilusad nga rally sanglit igo lang nipagawas sa ilang yangongo sa gobyerno ang mga militanteng pundok.

Wala usab ni makabalda sa dagan sa trapiko sanglit dunay daghang mga traffic enforcer gikan sa Cebu City Transportation Office (CCTO) inabagan sa kapulisan sa Dakbayan sa Sugbo.

“Naa tay na monitor nga mga grupo sa personalities nga nag conduct og rally. So, far wala tay nadawat nga report walay hulga. Peaceful, malinawon ra kaayo ang atong pag-monitor sa miaging pipila ka oras. Ang progressive groups dili sila bayolente ug han-ay ra ang ilang pag protesta,” matod ni Dalogdog.

Si Police Lt. Colonel Gerard Ace Pelare, spokesperson ni Police Brigadier General Anthony Aberin, hepe sa kapulisan sa Central Visayas, nipahibawo usab nga malinawon ang tibuok rehiyon 7.

Sa ilang monitoring, moabot lang sa kapin sa 100 ang nilusad og lihok protesta ug dinhi lang sa Dakbayan sa Sugbo.

Wala sila makatala og security issues. / AYB