Dan sa Brgy. Lusaran sementado na

Hapsay ug nindot na unya ang pagbiyahe sa mga nagpuyo sa Barangay Lusaran sa bukirang bahin sa Dakbayan sa Sugbo kon moagi sila sa Sitio Pinigturan kay magamit na gyud nila ang sementadong dalan sa maong lugar.

Kini human nga gi-turnover na sa kontraktor niadtong Biyernes, Mayo 9, 2025, ang maong proyekto ngadto sa kagamhanan sa dakbayan pinaagi kang Mayor Raymond Alvin Garcia ug sa Department of Engineering and Public Works.

Gipadayag sa mayor nga gawas sa maong proyekto, aduna pay umaabot nga laing mga programa ug proyekto alang sa barangay.

“Gianhi gyud nako ni kay usa ni sa akong mga pirmerong proyekto sukad nga nahimo ko nga mayor sa atong dakbayan sa Sugbo. So, at least, arang-arang na atong mga dan,” ingon niya.

“Ayaw mo kaguol kay mas daghan pa og mga programa ug proyekto ang maabot diri sa Barangay Lusaran,” dugang ni Mayor Garcia.

Usa sa mga residente nga si Cifriano Erana, 59, taga-Sitio Pinigturan, nipadayag sa iyang kalipay kay dili na sila maglisod og agi sa maong lugar, ilabi na kong mag-uwan.

“Nalipay mi kay diri sa Pinigturan di na man maglisod. Nalipay mi og dako sad nga gipasemento sa atong mayor. Lisod kaayo ni adto ngadto sa ubos kay tungason man kaayo. Ug kanang ting-uwan sa una, og graba pa ni, di man gyud katungas,” ingon niya.

“Mabaw pa ta og duot (sa sakyanan). Ang uban kadenahan pa gani ang mga jeep sa una. Karon di na man kay sementado na man tanan. Pagbiyahe-biyahe ba dali rata ngadto sa siyudad,” dugang ni Erana.

Sa bahin usab sa Barangay Budlaan, nipadayag si Konsehal Jocel Codilla sa iyang pagpasalamat ngadto sa Kagamhanan sa Dakbayan. (PR)