Gipahibawo sa hepe sa City of Talisay Traffic Operations & Development Authority (CT-TODA), Jonathan Tumulak nga kasamtangan di paagian sa mga motorista ang kalsada paingon sa Manipis ug kadtong manukad sa Toledo City, Agusto 16, 2025.
Kini gumikan sa mga pagdahili sa yuta ug mga bato sa pipila ka bahin sa dan sa Manipis, ug atol sa pagsuwat niining balita duna gihapoy mga nangatagak paingon sa kalsada.
Tungod niini, wala una paagii og mga sakyanan ang maong dan sa Manipis.
Ang mga sakyanan kutob lang sa viewing deck, boundary sa Manipis ug Campo 4.
Ang maong sitwasyon sa naasoy nga lugar resulta niadtong nasinati nga pagbundak sa uwan niadtong gabii sa Biyernes, Agusto 15.
Ang CT-TODA magpaabot sa advice gikan sa Department of Public Works and Highways (DPWH) kon luwas na nga pasudlan og mga sakyanan ang maong kalsada diin gianam ang paghimo sa clearing operations sa maong lugar. / FVQ