Gipahibalo sa Philippine Atmospheric, Geophysical and Astronomical Services Administration (Pagasa) niadtong Dominggo, Hulyo 6, 2025, nga nahimo na nga usa ka bagyo ang tropical cyclone Danas, nga kanhi ginganlan og Bising.
Sa ilang advisory, ang weather bureau nagkanayon nga ang weather system magpadayon sa paglihok paingon sa amihanan-sidlakan sa sunod 36 ka mga oras ug mahimong mosulod og balik sa Philippine area of responsibility (PAR) Dominggo sa gabii, o sayo sa buntag karong Lunes, Hunyo 7.
Gilauman kini nga mogawas ra dayon kini sa PAR.
Alas 10 sa buntag niadtong Dominggo, ang bagyong Danas nakit-an nga anaa sa 385 kilometros sa kasadpan-amihanan-kasadpan sa Itbayat, Batanes.
Nagdala kini og labing taas nga gikusgon sa hangin nga 120 kilometros matag oras (km/h) duol sa sentro, paghuros nga moabot sa 150 km/h, ug central pressure nga 975 hPa. Naglihok kini paingon sa amihanan-amihanan-sidlakan sa 10 km/h.
Nagpagawas ang Pagasa og gale warning sa amihanang Luzon.
Matod niini, gipaabot ang baluron nga kadagatan sa Batanes, Ilocos Norte, ug Ilocos Sur, ug sa kasadpang kabaybayonan sa Babuyan Islands, Ilocos Norte, La Union, Pangasinan, ug Zambales.
“Danas is forecast to steadily intensify over the next 24 hours. A weakening trend is expected over the East China Sea due to unfavorable conditions. It may weaken into a remnant low by Thursday (10 July) as it interacts with the landmass of China,” tipik sa pamahayag sa Pagasa.
Giawhag sa weather bureau ang publiko ug ang hingtungdang mga buhatan sa disaster risk reduction and management nga padayon nga mag-monitor sa mga update bahin niining bagyo.
Sa usa ka interbyu sa radyo, matod ni Office of Civil Defense officer-in-charge Bernardo Rafaelito Alejandro IV nga labing menos 3,773 ka mga pamilya ang naapektuhan sa bagyong Danas sa Ilocos Region (Region 1), Cordillera Administrative Region (CAR), ug Cagayan Valley (Region 2).
Matod niya, gibalita usab ang pagbaha sa apektadong mga rehiyon apan nagsugod na sa paghubas ang tubig. /TPM / SunStar Philippines