MOAWAY pagbalik sa US si one-time world title challenger Filipino Michael Dasmariñas aron kontrahon si world-ranked American Elijah Pierce sa usa ka eight-rounder karong Hulyo 25, 2025, sa The Tabernacle sa Atlanta, Georgia.
Ning awaya, nagtinguha si Dasmariñas nga makabalik siya sa world rankings nga mag-abli kaniya og pultahan alang sa posibilidad nga makapanuktok siya pagbalik alang sa world title.
Si Pierce kasamtangang world rated sa super bantamweight ug featherweight divisions.
Sa super bantamweight, si Pierce maoy No. 5 sa World Boxing Organization (WBO) ug No. 18 sa World Boxing Council (WBC) samtang sa featherweight, No. 4 siya sa World Boxing Association (WBA).
Sa labing ulahing away ni Dasmariñas sa Amerika, nasugamak siya sa 3rd round knockout nga kapildihan sa iyang pagsuway og ilog sa International Boxing Federation (IBF) bantamweight title ni Japanese superstar Naoya “Monster” Inoue niadtong Hunyo 19, 2021.
Si Dasmariñas kasamtangang nag-training sa Amerika kauban ang laing mga Pinoy nga sila si boxing legend Manny Pacquiao, Mark Magsayo, Jerwin Ancajas, Eumir Marcial, ug Jonas Sultan.
Naggunit si Dasmarinas og 36-4-2, 25 KOs nga rekord samtang si Pierce adunay 20-2, 6KOs nga rekord. / EKA, ESL