Ug mikuha siya og pan, unya human siya mipasalamat, gipikas niya kini ug gihatag ngadto kanila, nga nagaingon, ‘Kini mao ang akong lawas, nga itugyan alang kaninyo; buhata ninyo kini alang sa akong handumanan’. Ug sa samang paagi tapos ang panihapon gikuha niya usab ang kalis nga nagaingon, ‘Kini ang kalis sa bag-ong kasabutan diha sa akong dugo, nga iula alang kaninyo’” (b.19-20).
Dinhing tungora, gitukod ni Ginoong Hesus ang Sakramento sa Eyukaristiya, ang misa. Ginatuman kini matag adlaw sa Simbahang Katoliko isip paghandom kaniya.
Apan latas sa kapanahonan, adunay nahitabong kausaban sa teyolohiya sa Eyukaristiya.
Ang Simbahang Katoliko nagatuo gayud nga ang “pan” ug ang “bino” mahimo gayud literal nga “lawas” ug “dugo” ni Ginoong Hesus atol sa konsagrasyon diha sa misa. Gipamatud-an kini ni Ginoong Hesus mismo diha sa kasaysayan sa Simbahan.
Sa ika-8 nga siglo, didto sa Lanciano, Italya, adunay monghe nga nagduhaduha pa gihapon kon atol sa konsagrasyon mahimo ba gayud nga “lawas” ug “dugo” ni Ginoong Hesus ang “pan” ug ang “bino.”
Tuod man, sa laktod, ang “pan” nahimo gayong literal nga “lawas” nga may “dugo” ug kini nakapawagtang sa iyang pagduhaduha. Gipreserbar kini diha sa Lanciano, Italya, sukad niadtong sigloha.
Ug, ang makapakurat mao nga ang maong lawas ug dugo (unod sa kasingkasing sa tawo ug type AB ang dugo) nagpabiling buhi hangtod karon.
Gipamatud-an kini sa duha ka dili-magtutuo nga banggitang mga sayantipiko niadtong sayong bahin sa dekada 70 (daw, sa kasaysayan niini).
Busa, angay ug matarong lang gayud nga ang pagkalawat pagabuhaton sa dakong pagtahod tungod kay matuod gayod nga “lawas” ug “dugo” ni Ginoong Hesukristo ang gikalawat atol sa misa. Mao kini ang ginatawag, Doctrine of the REAL PRESENCE.
Ug kon dako kaayo nga pagtahod maoy hisgutan, angay ug matarong lang gayud unta nga kalawaton ang Ginoo diretso sa dila, samtang nagaluhod, ug dili pinaagi sa kamot.
Apan, subo nga palandungon nga ginakalawat si Ginoong Hesus sa kinamot, nga daw yano lang kaayo kining butanga sama og Fita biscuit. Ginabuhat kini sugod human sa Segundo Konseho Batikano, human gi-reengineer ni Arsobispo Annibale Bugnini ang Santos nga Misa, binak-apan sa unom ka mga protestanteng pastor, ug ang resulta ginatawag karon og Novus Ordo Misae.
Dugang pa niini, niadtong ika-51 nga International Eucharistic Congress nga gipahigayon sa Dakbayan sa Sugbo, Pilipinas, usa sa mga dinapit nga langyawng mamumulong mao si Obispo Robert Barron.
Si Barron nagkanayon atol sa iyang pakigpulong nga ang Eyukaristiya usa lamang ka simbolo, usa ka REPRESENTATION lamang sa lawas ug dugo ni Ginoong Hesukristo. Busa, dili gayud kini literal nga lawas ug dugo ni Ginoong Hesukristo.
Dinhi, tataw nga sukwahi kini sa kamatuoran nga nahitabo didto sa Lanciano, Italya, 13 na ka siglo ang nakalabay. Usa ka heresy ang gituldo ni Obispo Barron.
Busa, adunay dakong bili ang Katapusang Panihapon sa Ginoo sa kinabuhi sa nagatuo kaniya. Kay si Ginoong Hesus mismo nagaingon:
“Kay ang akong unod tinuod nga kalan-on, ug ang akong dugo tinuod nga ilimnon. Ang makigsalo sa akong unod ug moinom sa akong dugo magpabilin dinhi kanako ug ako diha kaniya …. ang mokaon kanako mabuhi tungod kanako” (Jn.6:55-57).
Apan aniay pahimangno si San Pablo. “Busa ang bisan kinsa nga mokaon niining pan o moinom niining kalis sa Ginoo sa paagi nga dili takos, nakasala sa lawas ug sa dugo sa Ginoo” (1Kor.11:27). Ang termino nga “dili takos” nagpasabot og estado sa sala, ilabi na ang salang mortal.