Ang Simbahang Katoliko migahin sa Mayo alang sa debosyon kang Birhen Maria. Mao nga matag Simbahang Katoliko nagasaulog sa relihiyusong kalihukan nga ginatawag og Flores de Mayo, alang sa pagpasidungog kang Birhen Maria, ang Inahan sa Diyos. Nahimo kining kabahin sa Katolikanhong relihiyusong tradisyon dinhi sa Pilipinas.
Sa bulan sa Mayo, ang mga bata magganayan ngadto sa Simbahan bitbit ang mga bulak matag hapon. Human sa Rosaryo, ang mga titik AVE MARIA iasayn ngadto sa walo ka bata ug iprosesyon kini gikan sa entrada sa Simbahan ngadto sa, o duol sa, Sangtuwaryo. Dayon mosunod ang ubang mga bata, bitbit ang mga bulak nga ihalad ngadto kang Birhen Maria, uban ang pag-awit sa mga alawiton kang Maria.
Sa Mayo 31, pagahimoon ang Santakrusan. Sa laktod, ang Santakrusan nagahandom sa pagkakaplag nila ni Rayna Elena ug Emperador Konstantino sa “matuod nga krus” sa panahon sa Romanhong Emperyo. Ipahigayon ang parada nila ni Rayna Elena ug Emperador Konstantino ubos sa arka, sugod sa Simbahan ug unya balik sa Simbahan.
Apan ang labing mahinungdanong aspeto sa Flores de Mayo mao nga usa kini ka pasidungog kang Birhen Maria. Ang Inahan sa Diyos gipasidunggan pinaagi sa pag-ampo sa Rosaryo, sa paghalad og mga bulak, ug sa pagkanta sa mga bata og mga alawiton kang Maria. Usa usab kini ka pagtudlo sa kabataan sa mga hiyas sa kamapaubsanon, kamasunoron, kamanggihatagon, ug kaputli sa Inahan sa Diyos.
Apan, gisaway si Maria sa mga dili-Katoliko. Ang mga Katoliko gipasanginlan nga nakahimo og blaspemi pinaagi sa pag-ampo ngadto kang Maria, ug dili direkta sa Diyos.
Ang mga Katoliko ginapahiran sa sayop nga pasangil. Ang Katolikanhong pagtulun-an kabahin ni Maria nagaingon nga dili siya Diyos, apan Inahan siya sa Diyos. Bisan si Ginoong Hesus mismo mipasidungog sa iyang Inahan atol sa Kasal sa Kana. Si Maria miingon kang Hesus: “Wala na silay bino” (Jn.2:3). Bisan kon si Ginoong Hesus morag nibalibad sa iyang Inahan, apan, misanong ra siya sa hangyo ni Maria, pinaagi sa pagsugo sa mga sulugoon: “Pun-a ninyo kanang mga banga sa tubig” (b.7), nga nausab ngadto sa labing lamian nga bino.
Ang Birhen Maria ginahukman nga sayop. Dili siya Diyos, tinuod kana; apan takos siya sa pasidungog tungod sa hiyas isip Inahan ni Hesus, ang Ginoo ug Manunubos. Tungod kay pinaagi kaniya, ang Anak sa Diyos nakabaton og lawas, nga mao: “Ang Pulong nahimong tawo ug mipuyo uban kanato (Jn.1:14). Ang mga Katoliko nagapasidungog kang Maria, dili nagasimba kang Maria.
Busa, kinahanglan ang pagtataw sa kalahian sa pasidungog ug sa pagsimba. Ang pagpasidungog mao ang paghatag og pagtahod sa … sama sa kaso sa mga santos, sa rason nga nakaabot sila sa lantag sa kasantos pinaagi sa Grasya sa Diyos. Ang pagsimba mao ang pagyukbo sa Labing Makagagahom nga Diyos, usa ka pagsimba kaniya lamang isip Maalamong hingpit, Anaa sa tanang dapit, Ubikitos nga Diyos, Absoluto nga Diyos. Ang pasidungog maoy alang sa mga santos; ang pagsimba maoy alang sa Diyos, ug sa Diyos lamang. Ang mga Katoliko wala magasimba kang Maria, apan nagapasidungog kang Maria isip Inahan sa Diyos.
Gawas pa niini, sa dihang magasangpit kang Maria ang mga Katoliko, nangaliyupo usab sila sa iyang panabang, nagahangyo kaniya nga iampo sila ngadto sa iyang Anak, si Ginoong Hesu-Kristo, ug ngadto sa Labing Makagagahom nga Amahan, tungod og alang sa iyang mga anak dinhi sa kalibotan kinsa nakigharong pa alang sa kaluwasan. Si Maria, isip Inahan ni Ginoong Hesu-Kristo, labing duol sa kasingkasing sa iyang Anak. Busa, makapangaliyupo siya sa iyang Anak sa samang paagi nga nangaliyupo siya kaniya didto sa Kasal sa Kana.
Busa, ang Flores de Mayo usa ka dakong pasidungog kang Maria, tungod sa iyang “Fiat”, ang Linatin sa “matuman unta kini” sumala sa pulong ni Anghel Gabriel, nga nagpahibalo nga magmabdos siya og usa ka batang lalaki sa lalang sa Espiritu Santo (twa.Mt.1:18;Lk.1:26-38).
Deo homnis honor et gloria!